Олий Мажлис юқори палатасида қўмиталар ва маҳаллий ҳокимият вакиллик органлари фаолиятини кучайтиришга кўмаклашувчи комиссиянинг мажлислари бўлиб ўтди. Уларда ялпи мажлис муҳокамасига киритилаётган бир қатор масалалар кўриб чиқилди, дея хабар беради «Халқ сўзи».
Хусусан, Сенатнинг Бюджет ва иқтисодий ислоҳотлар масалалари қўмитаси мажлисида «Суғурта фаолияти тўғрисида»ги қонуннинг Молия вазирлиги томонидан ижро этилишини ўрганиш натижалари таҳлил қилинди.
Бугунги кунда республикада соҳанинг турли йўналишларида фаолият кўрсатаётган 30 та суғурта компанияси мавжуд бўлиб, улар томонидан ўтган йил мобайнида тўланган суғурта тўловлари ҳажми 461,1 миллиард сўмни ташкил этиб, 2017 йилдагига нисбатан 71 фоиз ошган. Суғурта компанияларининг инвестициялари ҳажми эса 2 триллион сўмни ташкил қилди.
Ўрганиш жараёнида мазкур ҳужжатнинг ижросига масъул ваколатли орган — Молия вазирлиги томонидан бажарилиши мажбурий бўлган тўловга қобилиятлилик нормативлари ҳамда уларни аниқлаш тартибига оид зарур меъёрларни ишлаб чиқиш каби масалаларга сусткашлик билан қаралаётгани маълум бўлди.
Айниқса, суғурта бозори профессионал иштирокчилари суғурта фаолияти тўғрисидаги қонун ҳужжатларига риоя этиши ва тўловга қобилиятлиликнинг белгиланган меъёрлари ҳамда молиявий барқарорликнинг бошқа талаблари бажарилишини назорат қилиш каби масалалар масъуллар эътиборидан четда қолиб кетяпти.
Бунинг оқибатида суғурталанувчилар ёки суғурта объектларига нисбатан ноқонуний талаблар қўйиш орқали объэктни суғурталаш ҳолатлари юзасидан ҳақли эътирозлар билдирилмоқда. Мавжуд муаммолар ўз вақтида бартараф этилмагани боис республикада суғурта бозорининг жадал ривожланиши таъминланмаган, аҳоли ва тадбиркорлик субъектларининг суғурта бозорига нисбатан ишончи паст даражада қолмоқда.
Мажлисда мамлакат суғурта тизимидаги мавжуд муаммоларни бартараф этиш, ушбу соҳани янада ривожлантириш борасида бир қатор асосли таклиф ва тавсиялар билдирилди.
Изоҳ (0)