“O‘zikkilamchiranglimetall” gelli (sanoat) akkumulyatorlarini ishlab chiqaruvchi zavodni ishga tushiradi, deb xabar berdi Spot.
Loyihaning umumiy qiymati besh million dollardan ortiq bo‘lib, uni moliyalashtirish O‘zbekiston Xalq banki tomonidan berilgan kredit va korxona mablag‘lari hisobidan ta’minlanadi.
Gelli akkumulyatorlarining afzalliklaridan biri uning qo‘rg‘oshin kislotali akkumulyatorlarga qaraganda uzoqroq xizmat qilishida. Normal sharoitda ekspulatatsiya qilinganda akkumulyatorning yaroqlik muddati o‘rtacha 10 yilni tashkil etadi. Bundan tashqari, tizimning butunlay germetikligi ta’minlanadi. Shu sababli bunday akkumulyator batareyasi tashqi ta’sir, zarba va tebranishlarga chidamli bo‘ladi.
Shuningdek, korxonada maxsus investitsion dastur ishlab chiqilgan bo‘lib, unda hozirda ichki bozorga xorijdan olib kirilayotgan yangi turdagi mahsulotlarni ishlab chiqarish o‘zlashtiriladi.
“O‘zikkilamchiranglimetall” AJ Markaziy Osiyodagi rangli metallarni ikkilamchi qayta ishlash bo‘yicha yagona ixtisoslashtirilgan korxona bo‘lib, u respublikaning barcha iqtisodiyot tarmoqlariga sifatli rangli metallarni yetkazib beradi.
Izoh (0)