Farg‘ona viloyatining Qo‘shtepa tumanida tug‘ilgan Gulnora Topvoldiyeva (ism-shariflar o‘zgartirilgan) bebosh qiz bo‘lib ulg‘aydi, o‘yin-kulgi hamda ko‘ngilxushliklarni afzal bildi. Shuning uchun keyinchalik ota-ona uyidan chiqib ketdi. Bu haqda “Inson va qonun” hikoya qilmoqda.
Ana shunday kunlarning birida, Toshloq tumanida yashovchi Bahromjon ismli yigit bilan tanishib qoldi. Ularning munosabatlari ishqiy sarguzashtga aylanib, 2017-yilning 23- noyabrida G.Topvoldiyeva o‘g‘il farzand ko‘rdi. Tabiiyki, tayinli uy-joyi bo‘lmagani bois, bolasini boqish va tarbiyalashga juda qiynaldi.
Tanish-bilishlaridan so‘rab-surishtirib, o‘g‘lini Quvasoy shahrida istiqomat qiluvchi Azima Temirovaning tarbiyasiga topshirdi. Buning evaziga Azima opaga kuniga 15.000 so‘mdan haq to‘laydigan va chaqaloqning oziq-ovqatlarini yetkazib berib turadigan bo‘ldi. Ko‘nglida esa Javlonbekni sotib yuborishni rejalashtirdi.
Buning uchun Farg‘ona shahrida yashovchi tanishi Ma’mura Kavlonovadan maslahat so‘radi.
— Bunaqa tanishlarim yo‘q. Ammo surishtirib, javobini aytaman, — dedi Ma’mura.
Oradan bir necha kun o‘tib, u Gulnoraga qo‘ng‘iroq qildi.
— Qo‘qonlik bir dugonamning 2 ta qizi boru, o‘g‘li yo‘q. Bolangni o‘sha sotib olmoqchi. Rozimisan?
Ko‘pdan buyon xaridor kutayotgan ona esa o‘ylab ham o‘tirmay, darhol ko‘na qoldi. Dugonalar 2018-yil 27-fevral kuni Farg‘ona shahar markazida uchrashdi.
— Bu senga aytgan dugonam Vazira, — deya ularni tanishtirdi Ma’mura. Ayollar Javlonbekni 7000 AQSh dollariga oldi-sotdi qilishga kelishishdi. Maslahat pishgach esa Quvasoyga — A.Temirovanikiga yo‘l olishdi. Yo‘l-yo‘lakay Gulnora Vaziradan Azimadan bo‘lgan qarzi evaziga 250.000 so‘m naqd pul, bolasini olib chiqqach, kelishilgan 7000 AQSh dollarini sanab oldi.
Shu payt fuqarolik kiyimida yetib kelgan shaxslar o‘zlarini Farg‘ona viloyat IIB va Quvasoy shahar IIB xodimlari sifatida tanishtirib, uni qo‘lga oldi. Chunki G.Topvoldiyevaning harakatlari noqonuniy ekanligini bilgan M.Kavlonova va Yu.Faxriddinova bu xususda yuqoridagi idoralarga ariza bilan murojaat qilgandi.
Jinoyat ishlari bo‘yicha Quvasoy shahar sudining “Ziynat” mahalla fuqarolar yig‘inida bo‘lib o‘tgan sayyor sud majlisida Gulnora qilmishidan pushaymonligini bildirib, qonuniy yengillik hamda o‘g‘li qaytarib berilishini so‘radi. Sud unga qonuniy jazo tayinladi va o‘g‘li J.Topvoldiyev Farg‘ona shahar bolalar uyiga topshirilgani uchun uni qaytarib olish yuzasidan fuqarolik ishlari bo‘yicha sudga murojaat qilish huquqi tushuntirildi.
Izoh (0)