Qishloq xo‘jaligi vazirligida Isroil elchisi Eduard Shapira va “Gadot Agro” kompaniyasi vakillari bilan uchrashuv bo‘lib o‘tdi. Bu haqda “Daryo”ga vazirlik matbuot xizmati ma’lum qildi.
Uchrashuv davomida qishloq xo‘jaligi sohasida ikki tomonlama hamkorlikni rivojlantirish istiqbollarini muhokama qildi. Xususan, 2019-yil aprelida O‘zbekiston—Isroil agroforumini o‘tkazish taklifi ilgari surildi. Tadbir doirasida Isroilning yetakchi qishloq xo‘jaligi kompaniyalari vakillari viloyatlarga borib, O‘zbekiston qishloq xo‘jaligi bozori bilan tanishishi va ikki mamlakat fermerlari o‘rtasida to‘g‘ridan-to‘g‘ri aloqalar o‘rnatilishi rejalashtirilgan.
“Isroil qiyin iqlim va atrof-muhit sharoitida samarali qishloq xo‘jaligi tizimini yaratish uchun uzoq yo‘lni bosib o‘tdi. Biz isroillik hamkasblarimizning nafaqat mahsulot sifati va miqdorini yaxshilash, balki qishloq xo‘jaligida ilg‘or texnologiyalarni qo‘llashiga ham qiziqish bildirmoqdamiz”, — ta’kidladi uchrashuvda Qishloq xo‘jaligi vaziri Jamshid Xo‘jayev.
Isroil diplomatik vakolatxonasi boshlig‘i Qishloq xo‘jaligi vazirligi va Isroil elchixonasi o‘rtasida 2019-yilda harakatlar rejasini tayyorlash tashabbusini qo‘llab-quvvatladi. Shuningdek, Isroil tomoni ikki mamlakat o‘rtasida qishloq xo‘jaligi sohasida hamkorlikni yanada kengaytirish maqsadida “Mashav” tashkiloti orqali hamkorlikni faollashtirishni taklif qildi.
“Gadot Agro” kompaniyasi vakillari paxta ekinlarining hosildorligini oshirish va tuproq sho‘rlanishiga qarshi kurashish uchun tomchilatib sug‘orish texnologiyalarini joriy etishda o‘z yechimlarini taklif qildi.
Ma’lumot uchun, mazkur kompaniya 1950-yilda tashkil topgan bo‘lib, o‘simliklarni himoya qilish va urug‘lik resurslarini ta’minlashga ixtisoslashgan.
Izoh (0)