Қишлоқ хўжалиги вазирлигида Исроил элчиси Эдуард Шапира ва «Гадот Агро» компанияси вакиллари билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Учрашув давомида қишлоқ хўжалиги соҳасида икки томонлама ҳамкорликни ривожлантириш истиқболларини муҳокама қилди. Хусусан, 2019 йил апрелида Ўзбекистон—Исроил агрофорумини ўтказиш таклифи илгари сурилди. Тадбир доирасида Исроилнинг етакчи қишлоқ хўжалиги компаниялари вакиллари вилоятларга бориб, Ўзбекистон қишлоқ хўжалиги бозори билан танишиши ва икки мамлакат фермерлари ўртасида тўғридан-тўғри алоқалар ўрнатилиши режалаштирилган.
«Исроил қийин иқлим ва атроф-муҳит шароитида самарали қишлоқ хўжалиги тизимини яратиш учун узоқ йўлни босиб ўтди. Биз исроиллик ҳамкасбларимизнинг нафақат маҳсулот сифати ва миқдорини яхшилаш, балки қишлоқ хўжалигида илғор технологияларни қўллашига ҳам қизиқиш билдирмоқдамиз», — таъкидлади учрашувда Қишлоқ хўжалиги вазири Жамшид Хўжаев.
Исроил дипломатик ваколатхонаси бошлиғи Қишлоқ хўжалиги вазирлиги ва Исроил элчихонаси ўртасида 2019 йилда ҳаракатлар режасини тайёрлаш ташаббусини қўллаб-қувватлади. Шунингдек, Исроил томони икки мамлакат ўртасида қишлоқ хўжалиги соҳасида ҳамкорликни янада кенгайтириш мақсадида «Машав» ташкилоти орқали ҳамкорликни фаоллаштиришни таклиф қилди.
«Гадот Агро» компанияси вакиллари пахта экинларининг ҳосилдорлигини ошириш ва тупроқ шўрланишига қарши курашиш учун томчилатиб суғориш технологияларини жорий этишда ўз ечимларини таклиф қилди.
Маълумот учун, мазкур компания 1950 йилда ташкил топган бўлиб, ўсимликларни ҳимоя қилиш ва уруғлик ресурсларини таъминлашга ихтисослашган.
Изоҳ (0)