Samarqandda o‘zining quruvchilik faoliyati bilan taniqli bo‘lgan tadbirkor, “Umar” qurilish kompaniyasi rahbari va uning xodimlari qamoqqa olinganligi haqida xabar bergan edik. Bosh prokuraturaning “Daryo”ga ma’lum qilishicha, Samarqand shahar prokuraturasi “Umar” qurilish kompaniyasi rahbari Umar Rajabov, uning o‘g‘li Ruslan Rajabov, “Umar” kompaniyasiga qarashli yana ikki qurilish firmasi rahbarlari Shavkat Obloqulov va Fayzullo Fayziyevlar ustidan jinoiy ish qo‘zg‘atib, ehtiyot chorasi sifatida qo‘lga olgan.
Yirik tadbirkor Umar Rajabov noqonuniy qurgan deya e’tirof etilayotgan uylarda yashovchi fuqarolar “Daryo”ga murojaat qilgan.
“Daryo” muxbiri Farhod Norbo‘tayevning aniqlashicha, Dahbet ko‘chasida joylashgan ko‘p qavatli uyda hozirgi kunda 300 nafarga yaqin xonadon ko‘chib kelib 3 yildan buyon yashamoqda. 800 xonadonga mo‘ljallangan ushbu ko‘p qavatli uylarning qurilishi oxiriga yetmay to‘xtab qolgan.
2018-yilda Samarqandda yangi ko‘p qavatli uylar qurilishi bahona tarixiy obyektlarga zarar yetkazilayotgani, vayron etilayotgani haqidagi xabarlardan keyin tarixiy mavzelardagi qurilishlar to‘xtatilgandi. Noqonuniy qurilgan uylarni buzishga ko‘rsatma berilgandi.
O‘sha paytda Dahbet ko‘chasidagi “Umar” qurilish kompaniyasi qurgan ko‘p qavatli uylar ham buzilishi haqida gap-so‘zlar bo‘lgan. Biroq bu yerda yashovchi fuqarolar unga qarshilik qilgan. 2018-yilning 16-iyul kuni Samarqand shahar hokimi Furqat Rahimov aholi bilan uchrashib, ushbu holatni muhokama qilib, odamlarni tinchlantirishga uringanayotgani tasvirlangan video “Daryo” tahririyatiga kelib tushdi.
Videoda Samarqand shahri hokimi Furqat Rahimov fuqarolarga qarata “Agar sizlar masala yechilishini xohlasangiz, hozir hamma tarqaladi. Hamma. Hech kim qolmaydi. Men o‘zim qolaman, Umar aka odamlari bilan qoladi. Hamma tarqalsin. Sizlardan iltimos, hamma tarqalib ketsin”, deydi.
Umar Rajabov odamlarga qarata “Men sizlar bilan birga bo‘laman, hech qayerga bormayman”, degan. Shu joyda Umar Rajabovga havo yetishmay qolgan.
“Hammalaringiz Xudoga shukr denglar. Hammani himoyasini qiladigan xalqimizning eng katta mehribon otasi bor — Prezidentimiz borlar. Hech kim xafa bo‘lib, norozi bo‘lib qolmaydi. Men sizlarga shahar hokimi sifatida aytyapman, hamma tarqalib ketadi, hech kim bu yerda xalaqit bermasin. Bunaqangi yig‘ilish hech qaysimizga yarashmaydi. Uyat. Agar siz samarqandliklar madaniyatli, tushunadigan bo‘lsangiz tarqaling”, — degan Furqat Rahimov.
Video so‘nggida tadbirkor Umar Rajabovning mazasi qochib, ahvoli yomonlashib qolgani tasvirlangan.
“Daryo” voqealar rivojini kuzatib boradi.
Izoh (0)