O‘zbekiston Tashqi ishlar vazirligi Toshkent aeroportining tranzit zonasida bo‘lgan Ksyayman Xalimubiyeke haqida ma’lumot berdi.
“Ommaviy axborot vositalarining fuqaro Ksyayman Xalimubiyekening taqdiriga doir ko‘plab murojaatlari munosabati bilan shuni ma’lum qilamizki, u mamlakatimizga Qozog‘istondan kelgan va Toshkent xalqaro aeroportining tranzit zonasida bo‘lib turgan. U O‘zbekiston hududiga kirmadi va 9-fevral kuni Bangkok shahriga uchib ketdi”, - deyiladi vazirlik bayonotida.
Ta’kidlashlaricha, Xalimubiyeke avvalroq Tailanddan tranzit bilan Toshkent orqali Qozog‘istonning Olmaota shahriga borgan edi.
“Kun.uz”ning qayd etishicha, 8-fevral kuni Qozog‘istondagi jurnalistlar ijtimoiy tarmoqlarda etnik qozoq Ksyayman Xalimubiyekega Toshkent aeroportidan deportatsiya qilish tahdid solayotgani haqida xabarlar qoldirgandi.
Qozog‘istondagi “Atajurt” inson huquqlari tashkiloti vakillarining so‘zlariga ko‘ra, “Xitoyda tug‘ilgan va etnik qozoq hisoblangan Xalimubiyeke Xitoydan qochib, Toshkent aeroportida bo‘lgan. Xitoyning O‘zbekistondagi elchixonasi uni Xitoyga qaytarish niyatida edi”. “Agar O‘zbekiston hukumati uni Xitoyga qaytarib yuborsa, u kamida 20 yilga ozodlikdan mahrum etilishi yoki o‘lim jazosiga hukm qilinishi mumkin”, — deb yozgandi tashkilot vakillari.
Izoh (0)