Vengriyaning “Mediorad plyus Kft” kompaniyasi Andijonga 12 million yevro miqdorida investitsiya kiritish orqali, kardiojarrohlik yo‘nalishida faoliyat olib boruvchi zamonaviy klinikani barpo etadi. Bu haqda jurnalist Umidjon Mamarasulov xabar bermoqda.
Andijon viloyati hokimligi matbuot xizmatining ma’lum qilishicha, 9-fevral kuni Andijon viloyati hokimi Shuhratbek Abdurahmonov ushbu kompaniya vakillarini qabul qilgan. Qabul davomida investorlarga O‘zbekistonda yaratilayotgan qulay ishbilarmonlik muhiti, taqdim etilayotgan imtiyozlar va kafolatlar haqida ma’lumotlar berilgan.
— Kompaniyamiz Vengriya poytaxti Budapesht shahrida joylashgan bo‘lib, turli bino va inshootlarni jahon standartlari darajasida qurish, jihozlash bilan shug‘ullanadi, — deydi kompaniya vakili Vladimir Yuryevich Serov. – Viloyat hokimligining taklifiga binoan besh kun davomida Andijondagi bir qancha obyektlarni ko‘zdan kechirdik va viloyat reabilitatsiya shifoxonasini rekonstruksiya qilish, qo‘shimcha bino qurish va jihozlash uchun 12 million yevro miqdorida investitsiya kiritishga qaror qildik. Biz 52 ta yetakchi kompaniyaning avtorizatsiyasi, ya’ni ular tomonidan ishlab chiqariladigan uskuna va jihozlarni o‘zimiz qurgan binolarga o‘rnatish huquqiga egamiz. Bu bilan demoqchimanki, eng ilg‘or texnologiyalar asosida kapital rekonstruksiya qilish va jihozlash imkoniyatiga egamiz.
Viloyat sog‘liqni saqlash boshqarmasi boshlig‘i Avazbek Abdurahmonov so‘zlariga ko‘ra, sobiq shifoxona o‘rnida kardiojarrohlik yo‘nalishidagi zamonaviy klinika barpo etiladi. Bu bo‘yicha loyihalash ishlari boshlab yuborilgan.
Izoh (0)