O‘zbekiston Bosh prokuratura tomonidan nogironligi bo‘lgan fuqarolarning mol-mulki va yer uchastkasiga nisbatan soliq imtiyozlarining qo‘llanishi ahvoli o‘rganilganda, 2 944 nafar (2,4 foiz) nogironligi bo‘lgan shaxslarga soliq imtiyozlari qo‘llanilmasdan qolgani ma’lum bo‘lgan. Bu haqda Bosh prokuratura matbuot xizmati xabar berdi.
O‘zbekiston Soliq kodeksiga ko‘ra, I va II guruh nogironlarining 60 kvadrat metrgacha bo‘lgan mol-mulkiga soliq solinmaydi hamda ular yer solig‘idan to‘liq ozod qilingan. 2018-yil 1-noyabr holatiga ko‘ra, O‘zbekistonda nogironligi bo‘lgan jami 699 900 nafar shaxs qayd etilgan, shundan 64 176 kishi I guruh, 464 254 kishi II guruh, 71 492 kishi III guruhga mansub, 99 978 nafari esa 16 yoshgacha nogironligi bo‘lgan bolalardir. Ularning 528 430 nafari soliq imtiyoziga ega.
“Soliq kodeksiga asosan 121 493 nafar nogironligi bo‘lgan shaxslarga mol-mulk solig‘i bo‘yicha imtiyoz qo‘llanilib, 116 629 nafari yer solig‘idan ozod qilingan. O‘rganish davomida 2 944 nafar (2,4 foiz) nogironligi bo‘lgan shaxslarga soliq imtiyozlari qo‘llanilmasdan qolganligi aniqlandi”, — deyiladi Bosh prokuratura axborotida.
Bosh prokuratura ushbu holatning kelib chiqishiga:
- soliq, moliya, kadastr idoralari, pensiya jamg‘armalari va tibbiy-mehnat ekspert komissiyalarining soliq imtiyoziga ega bo‘lgan nogironligi bo‘lgan shaxslar haqida o‘zaro ma’lumot almashinuvi to‘g‘ri yo‘lga qo‘yilmaganligi;
- soliq imtiyozlari bilan bilan bog‘liq targ‘ibot tadbirlarining yetarlicha o‘tkazilmaganligi sabab bo‘lganini ta’kidlamoqda.
Izoh (0)