4-fevralning e’tiborga molik yangiliklari — “Daryo” dayjestida.
O‘zbekiston Prezidenti Shavkat Mirziyoyev farmoni bilan Ochilboy Ramatov Bosh vazirning birinchi o‘rinbosari — transport vaziri etib tayinlandi.
2018-yilning 28-mayidan beri Bosh vazir o‘rinbosari — hukumatning ta’lim, sog‘liqni saqlash, jismoniy madaniyat, sport va turizm masalalari kompleksi rahbari sifatida faoliyat yuritgan Aziz Abduhakimov endilikda Bosh vazirning ijtimoiy rivojlanish masalalari bo‘yicha o‘rinbosari etib tayinlandi.
2017-yildan beri Bosh vazir o‘rinbosari, O‘zbekiston Respublikasi Moliya vaziri — Makroiqtisodiy tahlil va prognozlashtirish, moliya va bank tizimlarini isloh qilish, xususiy tadbirkorlik va kichik biznesni rivojlantirish masalalari kompleksining rahbari sifatida faoliyat yuritgan Jamshid Qo‘chqorov endilikda Bosh vazir o‘rinbosari — O‘zbekiston Respublikasi Moliya vaziri etib tayinlandi.
O‘zbekistonda energetika sohasidagi yagona davlat siyosatini o‘rnatuvchi yangi vakolatli organ — energetika vazirligi tashkil etildi. Vazirlikka O‘zbekiston Bosh vaziri o‘rinbosari Alisher Sultonov rahbar bo‘ldi.
***
5-fevral kuni O‘zbekistonda kuchli shamol va qor kutilmoqda.
Havo o‘zgarib turadi, ayrim joylarda yog‘ingarchilik bo‘ladi (yomg‘ir qorga aylanishi mumkin). G‘arbdan sekundiga 7-12 metr tezlikda esayotgan shamol sekundiga 15-20 metrgacha, ba’zi joylarda sekundiga 23-28 metrgacha kuchayishi mumkin.
***
Bog‘cha tarbiyachisining mas’uliyatsizligi sabab 6 yoshli bola hayotdan ko‘z yumdi.
Samarqand viloyati Urgut tumanida 2012-yilda tug‘ilgan Rayhona Orziyeva bog‘chaning bolalar o‘yingohi maydonchasidagi temir arg‘imchoqda o‘ynayotgan vaqtda yiqilib tushib, tan-jarohati olib halok bo‘lgan.
Huquq-tartibot idoralari Orziyevaning arg‘imchoqdan yiqilib vafot etish holatini baxtsiz hodisa sifatida qayd etib, ishni yopib yuborishgan.
***
Toshkentda 15-yanvar kuni bedarak yo‘qolgan 26 yashar yigit Andijondan topildi.
Andijon viloyatining Xo‘jaobod tumanida yashovchilar bu yigitni ko‘rganlari haqida ichki ishlar idoralariga ma’lum qildi. Toshkent shahar IIBB xodimlari Xo‘jaobodga yetib bordi va Davronbek Sherboyev 4-fevral kuni sog‘-omon va o‘z avtomobilida onasining oldiga qaytdi.
***
Yigitali Mamajonov Muqaddas Sa’dullayeva bilan turmush qurganini nimaga yashirib yurganiga oydinlik kiritdi.
“Oilamga har xil ko‘zlar tegishini xohlamayman. Aslida ijtimoiy tarmoqlarga suratlarimizni joylashimiz ham notog‘ridir balki, shuning uchun ham avvalroq bu haqida ma’lum qilgimiz, suratlarni ham joylagimiz kelmagan edi. Birinchi va ikkinchi oilam bilan ham rasmlarni joylaganimizdan so‘ng har xil gap-so‘zlar, muammolar boshlanib ketgan edi. Menimcha oila sirligicha qolishi kerak”, — dedi u.
Izoh (0)