Ҳукуматдаги тайинловлар, Ўзбекистонда кутилаётган кучли шамол ва қор, боғчада йиқилиб вафот этган қизча ва куннинг бошқа муҳим хабарлари

4 февралнинг эътиборга молик янгиликлари — «Дарё» дайжестида.

Ўзбекистон Президенти Шавкат Мирзиёев фармони билан Очилбой Раматов Бош вазирнинг биринчи ўринбосари — транспорт вазири этиб тайинланди.

2018 йилнинг 28 майидан бери Бош вазир ўринбосари — ҳукуматнинг таълим, соғлиқни сақлаш, жисмоний маданият, спорт ва туризм масалалари комплекси раҳбари сифатида фаолият юритган Азиз Абдуҳакимов эндиликда Бош вазирнинг ижтимоий ривожланиш масалалари бўйича ўринбосари этиб тайинланди.

2017 йилдан бери Бош вазир ўринбосари, Ўзбекистон Республикаси Молия вазири — Макроиқтисодий таҳлил ва прогнозлаштириш, молия ва банк тизимларини ислоҳ қилиш, хусусий тадбиркорлик ва кичик бизнесни ривожлантириш масалалари комплексининг раҳбари сифатида фаолият юритган Жамшид Қўчқоров эндиликда Бош вазир ўринбосари — Ўзбекистон Республикаси Молия вазири этиб тайинланди.

Ўзбекистонда энергетика соҳасидаги ягона давлат сиёсатини ўрнатувчи янги ваколатли орган — энергетика вазирлиги ташкил этилди. Вазирликка Ўзбекистон Бош вазири ўринбосари Алишер Султонов раҳбар бўлди.

***

5 февраль куни Ўзбекистонда кучли шамол ва қор кутилмоқда.

Ҳаво ўзгариб туради, айрим жойларда ёғингарчилик бўлади (ёмғир қорга айланиши мумкин). Ғарбдан секундига 7-12 метр тезликда эсаётган шамол секундига 15-20 метргача, баъзи жойларда секундига 23-28 метргача кучайиши мумкин.

***

Боғча тарбиячисининг масъулиятсизлиги сабаб 6 ёшли бола ҳаётдан кўз юмди.

Самарқанд вилояти Ургут туманида 2012 йилда туғилган Райҳона Орзиева боғчанинг болалар ўйингоҳи майдончасидаги темир арғимчоқда ўйнаётган вақтда йиқилиб тушиб, тан-жароҳати олиб ҳалок бўлган.

Ҳуқуқ-тартибот идоралари Орзиеванинг арғимчоқдан йиқилиб вафот этиш ҳолатини бахтсиз ҳодиса сифатида қайд этиб, ишни ёпиб юборишган.

***

Тошкентда 15 январь куни бедарак йўқолган 26 яшар йигит Андижондан топилди.

Андижон вилоятининг Хўжаобод туманида яшовчилар бу йигитни кўрганлари ҳақида ички ишлар идораларига маълум қилди. Тошкент шаҳар ИИББ ходимлари Хўжаободга етиб борди ва Давронбек Шербоев 4 февраль куни соғ-омон ва ўз автомобилида онасининг олдига қайтди.

***

Йигитали Мамажонов Муқаддас Саъдуллаева билан турмуш қурганини нимага яшириб юрганига ойдинлик киритди.

«Оиламга ҳар хил кўзлар тегишини хоҳламайман. Аслида ижтимоий тармоқларга суратларимизни жойлашимиз ҳам нотоғридир балки, шунинг учун ҳам аввалроқ бу ҳақида маълум қилгимиз, суратларни ҳам жойлагимиз келмаган эди. Биринчи ва иккинчи оилам билан ҳам расмларни жойлаганимиздан сўнг ҳар хил гап-сўзлар, муаммолар бошланиб кетган эди. Менимча оила сирлигича қолиши керак», — деди у.