Tailandlik videoo‘yinlar ishqibozi internetga ulanish tezligini yaxshilashga urinib, halok bo‘ldi. Bu haqda Daily Mail xabar berdi.
21 yoshli Pattanadej Xomxuan Bangkokga Realm of Valor o‘yini bo‘yicha professional turnirda ishtirok etish uchun kelgan. U va uning do‘stlari mehmonxonaga joylashib, musobaqadan oldin mashq qilishni boshlagan.
Halok bo‘lgan o‘yinchining tanishlari aytishicha, u o‘zaro chatda aloqaning yomonligidan shikoyat qilgan. Internetga ulanish uchun mobil telefonidan foydalangan yigit aloqa yaxshiroq joyni izlab, balkonga chiqqan.
Bir necha daqiqadan so‘ng shu mehmonxonada turgan Xomxuanning do‘stlari uning o‘yin qahramoni anchadan buyon qimirlamayotganini payqagan. Ular yigitning xonasiga qaragan, biroq yigit u yerda bo‘lmagan. Ulardan biri derazaga qaragan va yigitning yerda yotgan tanasini ko‘rgan.
Chaqiruv bo‘yicha yetib kelgan tez yordam shifokorlari yigitni qutqarib qola olmagan. Yigit to‘rtinchi qavatdan yiqilgan paytda olingan jarohatlardan halok bo‘lgan.
Izoh (0)