Интернет тезлигини оширишга берилиб кетган таиландлик видеоўйин ишқибози балкондан йиқилиб, ҳалок бўлди

Таиландлик видеоўйинлар ишқибози интернетга уланиш тезлигини яхшилашга уриниб, ҳалок бўлди. Бу ҳақда Daily Mail хабар берди.

21 ёшли Паттанадеж Хомхуан Бангкокга Realm of Valor ўйини бўйича профессионал турнирда иштирок этиш учун келган. У ва унинг дўстлари меҳмонхонага жойлашиб, мусобақадан олдин машқ қилишни бошлаган.

Ҳалок бўлган ўйинчининг танишлари айтишича, у ўзаро чатда алоқанинг ёмонлигидан шикоят қилган. Интернетга уланиш учун мобил телефонидан фойдаланган йигит алоқа яхшироқ жойни излаб, балконга чиққан.

Бир неча дақиқадан сўнг шу меҳмонхонада турган Хомхуаннинг дўстлари унинг ўйин қаҳрамони анчадан буён қимирламаётганини пайқаган. Улар йигитнинг хонасига қараган, бироқ йигит у ерда бўлмаган. Улардан бири деразага қараган ва йигитнинг ерда ётган танасини кўрган.

Чақирув бўйича етиб келган тез ёрдам шифокорлари йигитни қутқариб қола олмаган. Йигит тўртинчи қаватдан йиқилган пайтда олинган жароҳатлардан ҳалок бўлган.