Rossiya shaharlarida bomba haqidagi xabarlar sababli evakuatsiyalar davom etmoqda

21-yanvardan buyon Rossiya shaharlarida tayyorlanayotgan portlashlar haqidagi anonim qo‘ng‘iroqlar sababli ommaviy evakuatsiyalar davom etmoqda. Barchasi Magnitogorskda yuz bergan portlashdan keyin boshlangan, noma’lum kishilar portlashni bomba haqidagi xatga bog‘lagan. 25-yanvar kuni evakuatsiyalar to‘lqini Irkutsk, Chita, Ulan-Ude va Yoqutistonga ham ta’sir qilgan. 28-yanvar kuni Sibirning bir nechta hududida kasalxonalar, maktablar va bolalar bog‘chalari bomba haqidagi xabar sababli evakuatsiya qilingan. Bu haqda TJournal xabar berdi.

31-yanvar kuni bomba haqidagi qo‘ng‘iroqlar Sankt-Peterburg, Moskva, Rostov, Qozon, Yekaterinburg va Rossiyaning boshqa shaharlarida qayd etilgan.

Sankt-Peterburgda qo‘ng‘iroq ish vaqti boshlanganidan keyin qabul qilingan. Yirik savdo markazlari, 20 ta kasalxona va 31 ta maktab evakuatsiya qilingan. Peterburg tarixida bu eng yirik ommaviy evakuatsiya bo‘ldi.

Moskvada o‘nlab obyektlar tekshirilmoqda. Ikkita savdo markazidan 800 kishi evakuatsiya qilingan. Xabar berilishicha, 20 ta obyekt bomba haqida xabar olgan, tekshiruvlar vaqtida taxminan ikki ming kishi evakuatsiya qilingan.