Moskva shahrida vaqtincha istiqomat qilayotgan Zuhra Boboqulova o‘zi bilmagan va xohlamagan holda yetti oylik farzandi Iskandarjondan judo bo‘lishiga bir bahya qoldi, deya xabar beradi “Jahonnews”.
15-yanvar kuni Z.Boboqulova o‘z farzandi bilan vaqtincha istiqomat qilayotgan kvartirani tekshirish chog‘ida Moskva politsiyasi xodimlari chaqaloqning tug‘ilish haqida hech qanday hujjati yo‘qligini aniqlagan.
Boboqulovaning yashash joyidan ro‘yxatdan o‘tish muddati o‘tgan edi.
Natijada politsiya xodimlari unga 5000 rubl miqdorida jarima belgilab, tegishli hujjatlari bo‘lmagani sababli Iskandarjonni onasidan olib qo‘yib, uni G.N.Speranskiy nomidagi Bolalar shahar klinik kasalxonasiga joylashtirgan.
Zuhra Boboqulova O‘zbekistonning Rossiyadagi elchixonasi konsullik bo‘limiga yordam so‘rab murojaat qilgan.
Olib borilgan amaliy ishlar natijasida Zuhra farzandi tug‘ilganda tug‘ruqxonadan uning tug‘ilgani haqidagi tibbiy ma’lumotnoma olmagani ma’lum bo‘lgan, bunga sabab mazkur ma’lumotnomani rasmiylashtirish uchun fuqaro pasporti va uning rus tiliga tarjimasi zarur bo‘lib, ona ushbu hujjatlarni taqdim eta olmagan.
Buning ustiga, biroz vaqt o‘tgach, bola tug‘ilgan tug‘ruq bo‘limi butunlay yopilib ketgan.
Diplomatik vakolatxona xodimlari o‘n kun mobaynida vasiylik-qarov organlari, kasalxona vakillari bilan bir necha marotaba uchrashgan, arxivlarda hujjatlarni qidirgan.
Nihoyat, bir necha kun davom etgan uchrashuvlar va qidiruvlardan so‘ng arxivda bolaning tug‘ilgani haqidagi hujjatlar topilgan.
Shundan so‘ng chaqaloqqa tug‘ilganlik haqidagi tibbiy ma’lumotnoma rasmiylashtirilgan va kasalxona rahbariyati nomiga bolani qaytarish haqida talabnoma rasmiylashtirilgan.
28-yanvar kuni Konsullik bo‘limi xodimlarining sa’y-harakati bilan Zuhra Boboqulovaga bola qaytarilgan.
Ma’lum bo‘lishicha, hozirda Zuhra Boboqulova va uning farzandiga O‘zbekistonga qaytish to‘g‘risida sertifikat rasmiylashtirilgan.
Izoh (0)