Москва шаҳрида вақтинча истиқомат қилаётган Зуҳра Бобоқулова ўзи билмаган ва хоҳламаган ҳолда етти ойлик фарзанди Искандаржондан жудо бўлишига бир баҳя қолди, дея хабар беради «Jahonnews».
15 январь куни З.Бобоқулова ўз фарзанди билан вақтинча истиқомат қилаётган квартирани текшириш чоғида Москва полицияси ходимлари чақалоқнинг туғилиш ҳақида ҳеч қандай ҳужжати йўқлигини аниқлаган.
Бобоқулованинг яшаш жойидан рўйхатдан ўтиш муддати ўтган эди.
Натижада полиция ходимлари унга 5000 рубль миқдорида жарима белгилаб, тегишли ҳужжатлари бўлмагани сабабли Искандаржонни онасидан олиб қўйиб, уни Г.Н.Сперанский номидаги Болалар шаҳар клиник касалхонасига жойлаштирган.
Зуҳра Бобоқулова Ўзбекистоннинг Россиядаги элчихонаси консуллик бўлимига ёрдам сўраб мурожаат қилган.
Олиб борилган амалий ишлар натижасида Зуҳра фарзанди туғилганда туғруқхонадан унинг туғилгани ҳақидаги тиббий маълумотнома олмагани маълум бўлган, бунга сабаб мазкур маълумотномани расмийлаштириш учун фуқаро паспорти ва унинг рус тилига таржимаси зарур бўлиб, она ушбу ҳужжатларни тақдим эта олмаган.
Бунинг устига, бироз вақт ўтгач, бола туғилган туғруқ бўлими бутунлай ёпилиб кетган.
Дипломатик ваколатхона ходимлари ўн кун мобайнида васийлик-қаров органлари, касалхона вакиллари билан бир неча маротаба учрашган, архивларда ҳужжатларни қидирган.
Ниҳоят, бир неча кун давом этган учрашувлар ва қидирувлардан сўнг архивда боланинг туғилгани ҳақидаги ҳужжатлар топилган.
Шундан сўнг чақалоққа туғилганлик ҳақидаги тиббий маълумотнома расмийлаштирилган ва касалхона раҳбарияти номига болани қайтариш ҳақида талабнома расмийлаштирилган.
28 январь куни Консуллик бўлими ходимларининг саъй-ҳаракати билан Зуҳра Бобоқуловага бола қайтарилган.
Маълум бўлишича, ҳозирда Зуҳра Бобоқулова ва унинг фарзандига Ўзбекистонга қайтиш тўғрисида сертификат расмийлаштирилган.
Изоҳ (0)