Andijon viloyati hokimi Shuhratbek Abdurahmonov Pokistonning Al Ashar Knitwear kompaniyasi rahbari Nasir Adil hamda Birlashgan Arab Amirliklarida faoliyat yurituvchi “Grin Fyucher” kompaniyasi raisi Kashif Muhammad bilan muzokaralar o‘tkazdi. Bu haqda “Daryo” muxbiri Mirolim Isajonov habar bermoqda.
Investorlar viloyatning investitsiya salohiyatini o‘rganib, hududlardagi imkoniyatlar bilan yaqindan tanishdi. Uchrashuvda viloyat rahbari investorlar bilan hamkorlikda Andijonga investitsiya kiritish, sohalar bo‘yicha dunyo tajribalarini qo‘llagan holda mahsulot ishlab chiqarish hamda ularning eksporti yuzasidan yarim milliard dollarlik memorandumlar imzoladi.
Muzokaralar davomida dastlab mevani qayta ishlash va eksporti, keyinchalik klaster usulidagi oziq-ovqat sanoati zonasini tashkil etish, tekstil sohalaridagi hamkorlik masalalari ham kelishib olindi. Kashif Muhammad zamonaviy miqyosdagi massiv barpo qilishni, unda uylar, maktab hamda maktabgachaga ta’lim muassasalaridan tashqari dam olish va golf maydonlari, qishki va yozgi cho‘milish havzalari qurish rejalari haqida gapirib o‘tdi.
Ma’lumot o‘rnida qayd etish joizki, Al Ashar Knitwear kompaniyasi Pokistonning tekstil sohasidagi yirik ishlab chiqaruvchi subyekti hisoblanadi. 20 yildan buyon tayyor kiyim-kechak mahsulotlari bilan xaridorlar ishonchini qozonib kelayotgan kompaniya asosiy mahsulotlarini Buyuk Britaniya hamda AQShga eksport qiladi. Dubay shahrida joylashgan “Grin Fyucher” kompaniyasi esa zamonaviy dizayndagi binolar qurish, ko‘chmas mulklar savdosi, ijaraga berish hamda ularni boshqarish bilan shug‘ullanib keladi.
Izoh (0)