Андижон вилояти ҳокими Шуҳратбек Абдураҳмонов Покистоннинг Al Ashar Knitwear компанияси раҳбари Насир Адил ҳамда Бирлашган Араб Амирликларида фаолият юритувчи «Грин Фючер» компанияси раиси Кашиф Муҳаммад билан музокаралар ўтказди. Бу ҳақда «Дарё» мухбири Миролим Исажонов ҳабар бермоқда.
Инвесторлар вилоятнинг инвестиция салоҳиятини ўрганиб, ҳудудлардаги имкониятлар билан яқиндан танишди. Учрашувда вилоят раҳбари инвесторлар билан ҳамкорликда Андижонга инвестиция киритиш, соҳалар бўйича дунё тажрибаларини қўллаган ҳолда маҳсулот ишлаб чиқариш ҳамда уларнинг экспорти юзасидан ярим миллиард долларлик меморандумлар имзолади.
Музокаралар давомида дастлаб мевани қайта ишлаш ва экспорти, кейинчалик кластер усулидаги озиқ-овқат саноати зонасини ташкил этиш, текстил соҳаларидаги ҳамкорлик масалалари ҳам келишиб олинди. Кашиф Муҳаммад замонавий миқёсдаги массив барпо қилишни, унда уйлар, мактаб ҳамда мактабгачага таълим муассасаларидан ташқари дам олиш ва гольф майдонлари, қишки ва ёзги чўмилиш ҳавзалари қуриш режалари ҳақида гапириб ўтди.
Маълумот ўрнида қайд этиш жоизки, Al Ashar Knitwear компанияси Покистоннинг текстил соҳасидаги йирик ишлаб чиқарувчи субъекти ҳисобланади. 20 йилдан буён тайёр кийим-кечак маҳсулотлари билан харидорлар ишончини қозониб келаётган компания асосий маҳсулотларини Буюк Британия ҳамда АҚШга экспорт қилади. Дубай шаҳрида жойлашган «Грин Фючер» компанияси эса замонавий дизайндаги бинолар қуриш, кўчмас мулклар савдоси, ижарага бериш ҳамда уларни бошқариш билан шуғулланиб келади.
Изоҳ (0)