Ижтимоий тармоқларда ходимларнинг меҳнат ҳуқуқлари бузилишига оид, хусусан иш берувчининг айби билан ходимга ойлик маошини ўз вақтида берилмаётгани хусусида кўплаб мурожаатлар эълон қилинмоқда, деб ёзади ЎзА.
Масалан, Избоскан туманида яшовчи фуқаро Т. Болтабоев Facebook’нинг «Халқ билан мулоқот /Диалог с народом» гуруҳига тумандаги Механика таъмирлаш корхонасида ишлаб келаётганлиги, бироқ 2018 йил август ойидан буён иш ҳақи берилмаётганлиги ҳақида мурожаат жойлаштирган.
Андижон вилояти адлия бошқармаси томонидан мазкур ҳолат ўрганилганда, Андижон вилояти механика таъмирлаш корхонасида фуқаро Т. Болтабоев ва яна 24 нафар ходимнинг бир неча ойлардан буён иш ҳақи тўланмасдан келинаётгани аниқланган.
Қонунчиликка кўра, иш берувчи ўзининг молиявий ҳолатидан қатъи назар, ходимга бажарган иши учун ҳақ тўлаши шарт. Мулкчилик шаклидан қатъи назар, корхоналар ва ташкилотлар раҳбарлари ходимларга иш ҳақи ўз вақтида ва тўлиқ тўланиши учун шахсан жавобгардир.
Бироқ, Андижон вилояти механика таъмирлаш корхонасидамаъмурияти ўз мажбуриятларини бузиб, 2018 йил 1 ноябрь кунига қадар ходимларга жами 55 миллион 766 минг 474 сўм иш ҳақи бермаган.
Адлия вазирлиги жамоатчилик билан алоқалар бўлимида маълум қилишларича, юқоридагиларга асосан вилоят адлия бошқармаси томонидан 2018 йил 12 ноябрь куни ходимлар иш ҳақини зудлик билан тўлаш юзасидан корхонага расмий муносабат билдирилган.
Натижада ходимларга тўланмай келинаётган иш ҳақлари тўлиқ тўлаб берилган. Қонун ҳужжатлари бузилишига йўл қўйган бош ҳисобчига нисбатан эса интизомий жазо чораси қўлланилган.
Изоҳ (0)