Toshkentda 3—5-oktabr kunlari Plastex Uzbekistan an’anaviy xalqaro ko‘rgazmasi bo‘lib o‘tadi

3—5-oktabr kunlari Toshkent shahridagi “O‘zekspomarkaz” milliy ko‘rgazmalar majmuasida “Qadoqlash va bosma ishi — O‘ZuPACK — O‘ZBEKinPRINT” hamda “Plastmassa va polimerlar sanoati — Plastex Uzbekistan” an’anaviy xalqaro ko‘rgazmalari bo‘lib o‘tadi. Bu haqda O‘zA xabar berdi.

Iteca Exhibitions xalqaro ko‘rgazmalar kompaniyasi va bir qator tashkilotlar hamkorligida tashkil etilayotgan ko‘rgazmalardan asosiy maqsad mazkur yo‘nalishlarni yangi bosqichga ko‘tarish va tizimga eng yangi texnologiyalarni jalb qilish, ishlab chiqarish quvvatlarini modernizatsiyalash va o‘zaro manfaatli hamkorlikni mustahkamlashga qaratilgan.

Iteca Exhibitions xalqaro ko‘rgazmalar kompaniyasi marketing menejeri Bahrom To‘ychiyevning ma’lumot berishicha, bu yilgi ko‘rgazmalar namoyishi ham o‘ziga xos tarzda tashkil etiladi. O‘tgan galgi namoyishda 12 ta davlatdan 80 ta kompaniya qatnashgan bo‘lsa, bu safar 16 ta mamlakatdan 140 ta kompaniyaning ishtiroki kutilmoqda. Ular orasida birinchi bor qatnashayotgan ishtirokchilar ham bor. Ko‘rgazmaga qiziquvchilar uchun onlayn tarzda ro‘yxatdan o‘tish imkoniyati yaratilgan.