Zaynab Xoldorova (ism-shariflar o‘zgartirilgan) anchadan buyon Sergelida qurilayotgan arzon uy-joylardan olmoqchi bo‘lib yurgandi. Bu haqda “Xalq so‘zi” xabar bermoqda.
Unga tanishi Mehri Sattorova Bahrom ismli tanishi borligini aytib, shu yigit bilan gaplashib ko‘rishni maslahat berdi. Shuningdek, uning telefon raqamini ham yozib berdi. Zaynab Xoldorova kechki payt Bahromga qo‘ng‘iroq qildi. O‘zini tanishtirib, telefon raqamini Mehridan olganini, arzonlashtirilgan uylardan olishda yordam berishini iltimos qildi.
Ayol Bahrom muqaddam besh marta aynan firibgarlik jinoyati uchun sudlanganligi, haydovchilik orqasidan ro‘zg‘or tebratayotgani, ayni paytda avtomashinasini ta’mirlatishga pul qidirayotganini qayoqdan ham bilsin. Shu bois, bu qo‘ng‘iroq Bahrom uchun ayni muddao bo‘ldi. U o‘zi bilganicha buning uchun qanday hujjatlar kerak bo‘lishini sanab o‘tib, bu ishni 1000 AQSh dollariga hal qilib berishi haqida lof urdi. Shuningdek, buni Mehrining hurmati uchun ekanligini ham gap orasida qistirib o‘tdi. Z.Xoldorovaning roziligini olgach, ertasi kuni barcha hujjatlar bilan 600 dollar olib kelishini tayinlab, qolganini ish bitganidan keyin olishini bildirdi.
Bu javobdan og‘zi qulog‘iga yetgan Z.Xoldorova vaqtni o‘tkazmay M.Sattorovaga telefon qildi va Bahrom atigi 1000 dollarga uy olib berishda ko‘maklashishga rozi bo‘lganini aytib, unga minnatdorchilik bildirdi. M.Sattorova avvaliga uning xursandchiligiga sherik bo‘ldi. Biroq, bu ish qonunga xilof ekanligi haqida o‘ylab qoldi. Qolaversa, bu savdoning bir uchida o‘zi turibdi. Mehri ko‘nglidagi shubhani Zaynabga aytgan edi, u ham o‘ylanib qoldi.
Xullas, ikki dugona gapni bir yerga qo‘yib, bu haqda tegishli organlarga murojaat qildi. Ertasi kuni Bahrom Do‘smatov Z.Xoldorovadan hujjatlarning nusxalari bilan 600 AQSh dollarini olgan paytda qo‘lga olindi.
Sud tomonidan uning qilmishiga yarasha jazo tayinlandi.
Izoh (0)