Samarqand shahrida joylashgan 37-sonli maktabgacha ta’lim muassasasida “Ma’naviy yuksalish va vatanparvarlik kuni” munosabati bilan Samarqand garnizoni Ma’naviyat va ma’rifat markazi tomonidan konsert dasturi uyushtirildi. Bu haqda Mudofaa vazirligi matbuot xizmati “Daryo”ga ma’lum qildi.
Unda Markaziy harbiy okrug vakillari, okrug faxriylar ishlari bo‘yicha kengash raisi O‘lmas Shodiyev, viloyat maktabgacha ta’lim boshqarmasi xodimlari ishtirok etdi.
Tadbir davomida bolajonlar o‘rtasida shaxmat-shashka, rasm chizish kabi turli ko‘ngilochar musobaqalar o‘tkazildi. O‘z qobiliyatini namoyish etgan bolalarga esdalik sovg‘alari ulashildi.
Shuningdek, Jizzax viloyatidagi harbiy qismlardan birida harbiy xizmatchilar bilan kitobxonlikka bag‘ishlangan uchrashuv bo‘lib o‘tdi. Unda O‘zbekistonda xizmat ko‘rsatgan artist, kinorejissyor Jo‘ra Isroilov, aktyor Gulmurod Xudoynazarov, O‘zbekiston yozuvchilar uyushmasi Jizzax viloyati a’zosi Sayfiddin Akonov qatnashib, yig‘ilganlar bilan samimiy suhbat uyushtirdi.
Jizzax viloyati kasaba uyushmasi tomonidan harbiy xizmatchilarga 150 dan ortiq jahon va o‘zbek adabiyoti durdona asarlari sovg‘a qilindi. Bundan tashqari tabir doirasida harbiy xizmatchilarning oila a’zolari uchun harbiy qismda joylashgan kutubxona bo‘ylab ekskursiya tashkil etildi.
Izoh (0)