Toshkent — Termiz xalqaro avtoyo‘lining Mirzaobod tumani hududidan o‘tadigan qismi yoqasida o‘tovlar tikilgan manzil bunyod etildi. Bu haqda “Xalq so‘zi” xabar bermoqda.
E’tiborlisi, uning bekat-do‘koni uchun ham ana shu qadimiy turar-joy imorati ko‘rinishi tanlandi.
“Bo‘sh turgan tashlandiq bostirma binosidan ferma sifatida foydalanyapmiz. Hozircha 30 ta tuyamiz bor. Hademay ular yana 12 taga ko‘payadi. Davolanuvchilarga tuya suti sog‘ilgan zahoti issiqligida taqdim etiladi. Bundan oldin u maxsus filtrlash jarayonidan o‘tkaziladi. O‘tovlarga sandal ham o‘rnatganmiz, unda g‘o‘zapoyadan cho‘g‘ hosil qilamiz. Shuningdek, zamonaviy tibbiy apparatlarni keltirish va malakali tibbiyot xodimlarini ishga jalb etish harakatidamiz”, — deydi mazkur loyihani amalga oshirgan Muhiddin Mahkamov.
Tadbirkorning aytishicha, Surxondaryoning turli qishloqlaridan olib kelingan o‘tovlarning “yoshi” ham 50-60 yilning narisida. Masalan, sherobodlik 82 yoshli G‘uzor bobodan sotib olingan o‘tov unga uylanganida o‘sha vaqtning urfiga ko‘ra otasi tomonidan “Qora uy” sifatida tiklab berilgan ekan. O‘tovlarni raqamlash bilan birga, har biriga ularning tarixi, asl egasi, eski manzili yozilgan lavhalarni ham ilib qo‘yilishi bu manzilning moziydan hikoya qiluvchi maskanga aylanishini ham kafolatlaydi. Xalqaro avtoyo‘l tegrasidagi ushbu go‘sha esa “O‘tovlar shaharchasi” sifatida sayyohlarning sevimli bekatiga aylanadi.
Izoh (0)