Тошкентда 3—5 октябрь кунлари Plastex Uzbekistan анъанавий халқаро кўргазмаси бўлиб ўтади

3—5 октябрь кунлари Тошкент шаҳридаги «Ўзекспомарказ» миллий кўргазмалар мажмуасида «Қадоқлаш ва босма иши — O‘ZuPACК — O‘ZBEKinPRINT» ҳамда «Пластмасса ва полимерлар саноати — Plaxtex Uzbekistan» анъанавий халқаро кўргазмалари бўлиб ўтади. Бу ҳақда ЎзА хабар берди.

Iteca Exhibitions халқаро кўргазмалар компанияси ва бир қатор ташкилотлар ҳамкорлигида ташкил этилаётган кўргазмалардан асосий мақсад мазкур йўналишларни янги босқичга кўтариш ва тизимга энг янги технологияларни жалб қилиш, ишлаб чиқариш қувватларини модернизациялаш ва ўзаро манфаатли ҳамкорликни мустаҳкамлашга қаратилган.

Iteca Exhibitions халқаро кўргазмалар компанияси маркетинг менежери Баҳром Тўйчиевнинг маълумот беришича, бу йилги кўргазмалар намойиши ҳам ўзига хос тарзда ташкил этилади. Ўтган галги намойишда 12 та давлатдан 80 та компания қатнашган бўлса, бу сафар 16 та мамлакатдан 140 та компаниянинг иштироки кутилмоқда. Улар орасида биринчи бор қатнашаётган иштирокчилар ҳам бор. Кўргазмага қизиқувчилар учун онлайн тарзда рўйхатдан ўтиш имконияти яратилган.