Тошкент — Термиз халқаро автойўлининг Мирзаобод тумани ҳудудидан ўтадиган қисми ёқасида ўтовлар тикилган манзил бунёд этилди. Бу ҳақда «Халқ сўзи» хабар бермоқда.
Эътиборлиси, унинг бекат-дўкони учун ҳам ана шу қадимий турар-жой иморати кўриниши танланди.
«Бўш турган ташландиқ бостирма биносидан ферма сифатида фойдаланяпмиз. Ҳозирча 30 та туямиз бор. Ҳадемай улар яна 12 тага кўпаяди. Даволанувчиларга туя сути соғилган заҳоти иссиқлигида тақдим этилади. Бундан олдин у махсус фильтрлаш жараёнидан ўтказилади. Ўтовларга сандал ҳам ўрнатганмиз, унда ғўзапоядан чўғ ҳосил қиламиз. Шунингдек, замонавий тиббий аппаратларни келтириш ва малакали тиббиёт ходимларини ишга жалб этиш ҳаракатидамиз», — дейди мазкур лойиҳани амалга оширган Муҳиддин Маҳкамов.
Тадбиркорнинг айтишича, Сурхондарёнинг турли қишлоқларидан олиб келинган ўтовларнинг «ёши» ҳам 50-60 йилнинг нарисида. Масалан, шерободлик 82 ёшли Ғузор бободан сотиб олинган ўтов унга уйланганида ўша вақтнинг урфига кўра отаси томонидан «Қора уй» сифатида тиклаб берилган экан. Ўтовларни рақамлаш билан бирга, ҳар бирига уларнинг тарихи, асл эгаси, эски манзили ёзилган лавҳаларни ҳам илиб қўйилиши бу манзилнинг мозийдан ҳикоя қилувчи масканга айланишини ҳам кафолатлайди. Халқаро автойўл теграсидаги ушбу гўша эса «Ўтовлар шаҳарчаси» сифатида сайёҳларнинг севимли бекатига айланади.
Изоҳ (0)