So‘nggi yillarda O‘zbekistonda tabiiy gaz iste’moli 1,3 barobarga oshib, yillik 65 milliard metr kub gaz qazib olish darajasida 50 milliard metr kubni tashkil etadi. Quyida soha mutaxassislarining ushbu masala yuzasidan fikrlari keltirib o‘tiladi.
Bugungi kunda O‘zbekistondagi 95 foiz gaz iste’molchilarining xonadonida gaz hisoblagich o‘rnatilgan. Biroq ma’lumotlarni yig‘ishning zamonaviy tizimi mavjud emasligi respublika hududida iste’mol qilinayotgan gazni hisobga olish va uning iste’molini nazorat qilishga imkon bermaydi.
Rasmiy statistik ma’lumotlarga ko‘ra, iste’molchilardan tabiiy gaz uchun to‘lovlarni yig‘ib olish darajasi 60 foizni tashkil etadi.
O‘zbekiston Prezidenti Shavkat Mirziyoyevning farmoni bilan 2017-yilning may oyida O‘zbekiston Bosh prokuraturasi huzurida Majburiy ijro byurosi tashkil etildi. Byuro faoliyat boshlagan kundan hozirga qadar aholidan 5,4 trillion so‘m miqdoridagi qarzdorlikni undirishga muvaffaq bo‘lgan.
“O‘zbekneftgaz” respublika gaztransport tizimini modernizatsiya qilish uchun investorlar izlash ishini jadallashtirdi. Ushbu g‘oyani amaliyotga tatbiq etish nafaqat katta miqdordagi investitsiyani, balki gaz ta’minotini hisob-kitob qilish tizimini tubdan o‘zgartirishni talab etadi.
Sentabr oyi o‘rtalarida neft gaz kompaniyasi rahbariyati Osiyo taraqqiyot banki delegatsiyasi bilan respublika gaztransportini rivojlantirish, modernizatsiya qilish, qayta texnik jihozlash masalalari bo‘yicha muzokaralar o‘tkazdi.
Xuddi shunday muzokaralar avgust oyida Toshkent shahrida Yevropa tiklanish va taraqqiyot banki bilan bo‘lib o‘tdi.
Avvalroq “O‘zbekneftgaz” respublika gaz o‘tkazgichlari tizimini 2018—2025-yillarda 1,5 milliard dollar evaziga modernizatsiya qilish dasturini ishlab chiqayotganini ma’lum qilgan edi.
Ushbu dastur yangi gaz o‘tkazgichlari va kompressor stansiyalarini qurish, gaz qazib chiqaruvchi agregatlarni modernizatsiya qilish va almashtirish, gaz o‘tkazgichlardagi “energetik tor joy”larni bartaraf etishni ko‘zda tutadi.
Izoh (0)