Tadbirkorlikni qo‘llab-quvvatlash va rivojlantirish bo‘yicha Respublika komissiyasi va hududiy ishchi guruhlar tomonidan O‘zbekistonning barcha hududlarida o‘rganishlar olib borilmoqda. Bu haqda O‘zA xabar bermoqda.
O‘rganishlar davomida tadbirkorlik loyihalarini amalga oshirish, bo‘sh turgan yer va binolarni aniqlash, investitsiya jalb etish masalalarida bir qator muammolar aniqlanib, ularning yechimi borasida choralar ko‘rilmoqda.
Qisqa vaqt ichida bu ishlar o‘zining ijobiy natijalarini ham bera boshladi. Ayniqsa, bo‘sh turgan obyektlarni va yer uchastkalarini aniqlash va ularni “E-IJRO AUKSION” yagona elektron savdo dasturi orqali sotishda katta ish qilindi.
Hozirgi kunga qadar respublika bo‘yicha 6 858 ta (8470 gektar) bo‘sh yer uchastkasi aniqlangan. 589 ta bo‘sh yer uchastkasi auksion orqali savdoga qo‘yilgan.
Shu bilan birga, ayrim viloyatlarda turgan yer uchaskalarni obyektlarni elektron onlayn-auksionga chiqarish panja orasidan qaralgan holatlar ham uchramoqda. Masalan, Navoiy viloyatida 6 ta, Farg‘ona viloyatida 4 tagina obyekt savdoga chiqarilgan bo‘lsa, Qashqadaryo viloyatida bironta ham bo‘sh yer uchastkasi savdoga qo‘yilmagan.
Hududiy ishchi guruhlar tomonidan joriy yilning 12—21-sentabr kunlari jami 1619 ta muammo aniqlangan bo‘lsa, shundan birinchi o‘rinda 32,9 foiz ko‘rsatkich bilan banklardan kredit ajratishga oid masalalar turibdi. Muammolarning 107 tasi “Xalq banki”, 74 tasi Milliy bank, 66 tasi Markaziy bank, 54 tasi “Agrobank”, 54 tasi “Asaka”, 41 tasi “Mikrokreditbank” va 31 tasi “O‘zsanoatqurilishbank”ga tegishli.
Ajablanarlisi, hozirgi kunda tijorat banklarida xalqaro moliya institutlarining 3,5 milliard AQSh dollari miqdoridagi o‘zlashtirilmagan kredit liniyalari mavjud. Ikkinchi o‘rinda (22,1 foiz) yer maydoni ajratish bilan bog‘liq muammolar. Kommunikatsiya tarmoqlariga ulanish esa biznes subyektlarini qiynayotgan masalalarning 10,2 foizini tashkil qilmoqda. Muammolarning 9,9 foizi bino ajratish, 7,7 foizi tadbirkorlarning huquqlarini himoya qilish bilan bog‘liq. Hududiy ishchi guruhlar tomonidan aniqlangan muammolarning 293 tasi joyida bartaraf etilgan.
Ushbu holatni viloyatlar kesimida olganda, yuzaga chiqqan muammolar soni Toshkent viloyatida 270 ta, Qashqadaryo viloyatida 178 ta, Xorazm viloyatida 177 ta, Navoiy viloyatida 155 ta, Sirdaryo viloyatida esa 138 tani tashkil qilmoqda.
Shuningdek, vazirlik va idoralarda, mahalliy hokimliklarda ham tadbirkorlik subyektlari bilan bog‘liq anchagina muammolar to‘planib qolganligi ma’lum bo‘ldi. Ushbu masalalarning 511 ta hududiy hokimliklar, 105 tasi Raqobat qo‘mitasi, 86 tasi “O‘zbekenergo” tashkiloti, 57 tasi “Yergeodezkadastr” qo‘mitasi, 46 tasi “O‘zbekneftgaz” AJ va 23 tasi “O‘ztransgaz” aksiyadorlik jamiyatiga tegishli.
Izoh (0)