Тадбиркорликни қўллаб-қувватлаш ва ривожлантириш бўйича Республика комиссияси ва ҳудудий ишчи гуруҳлар томонидан Ўзбекистоннинг барча ҳудудларида ўрганишлар олиб борилмоқда. Бу ҳақда ЎзА хабар бермоқда.
Ўрганишлар давомида тадбиркорлик лойиҳаларини амалга ошириш, бўш турган ер ва биноларни аниқлаш, инвестиция жалб этиш масалаларида бир қатор муаммолар аниқланиб, уларнинг ечими борасида чоралар кўрилмоқда.
Қисқа вақт ичида бу ишлар ўзининг ижобий натижаларини ҳам бера бошлади. Айниқса, бўш турган объектларни ва ер участкаларини аниқлаш ва уларни «E-IJRO AUKSION» ягона электрон савдо дастури орқали сотишда катта иш қилинди.
Ҳозирги кунга қадар республика бўйича 6 858 та (8470 гектар) бўш ер участкаси аниқланган. 589 та бўш ер участкаси аукцион орқали савдога қўйилган.
Шу билан бирга, айрим вилоятларда турган ер учаскаларни объектларни электрон онлайн-аукционга чиқариш панжа орасидан қаралган ҳолатлар ҳам учрамоқда. Масалан, Навоий вилоятида 6 та, Фарғона вилоятида 4 тагина объект савдога чиқарилган бўлса, Қашқадарё вилоятида биронта ҳам бўш ер участкаси савдога қўйилмаган.
Ҳудудий ишчи гуруҳлар томонидан жорий йилнинг 12—21 сентябрь кунлари жами 1619 та муаммо аниқланган бўлса, шундан биринчи ўринда 32,9 фоиз кўрсаткич билан банклардан кредит ажратишга оид масалалар турибди. Муаммоларнинг 107 таси «Халқ банки», 74 таси Миллий банк, 66 таси Марказий банк, 54 таси «Агробанк», 54 таси «Асака», 41 таси «Микрокредитбанк» ва 31 таси «Ўзсаноатқурилишбанк»га тегишли.
Ажабланарлиси, ҳозирги кунда тижорат банкларида халқаро молия институтларининг 3,5 миллиард АҚШ доллари миқдоридаги ўзлаштирилмаган кредит линиялари мавжуд. Иккинчи ўринда (22,1 фоиз) ер майдони ажратиш билан боғлиқ муаммолар. Коммуникация тармоқларига уланиш эса бизнес субъектларини қийнаётган масалаларнинг 10,2 фоизини ташкил қилмоқда. Муаммоларнинг 9,9 фоизи бино ажратиш, 7,7 фоизи тадбиркорларнинг ҳуқуқларини ҳимоя қилиш билан боғлиқ. Ҳудудий ишчи гуруҳлар томонидан аниқланган муаммоларнинг 293 таси жойида бартараф этилган.
Ушбу ҳолатни вилоятлар кесимида олганда, юзага чиққан муаммолар сони Тошкент вилоятида 270 та, Қашқадарё вилоятида 178 та, Хоразм вилоятида 177 та, Навоий вилоятида 155 та, Сирдарё вилоятида эса 138 тани ташкил қилмоқда.
Шунингдек, вазирлик ва идораларда, маҳаллий ҳокимликларда ҳам тадбиркорлик субъектлари билан боғлиқ анчагина муаммолар тўпланиб қолганлиги маълум бўлди. Ушбу масалаларнинг 511 та ҳудудий ҳокимликлар, 105 таси Рақобат қўмитаси, 86 таси «Ўзбекэнерго» ташкилоти, 57 таси «Ергеодезкадастр» қўмитаси, 46 таси «Ўзбекнефтгаз» АЖ ва 23 таси «Ўзтрансгаз» акциядорлик жамиятига тегишли.
Изоҳ (0)