Toshkentda aktrisani qasddan o‘ldirib, jasadini kanalga oqizib yuborgan qotillarga qamoq jazosi tayinlandi. “Bir jinoyat izidan” ko‘rsatuvining navbatdagi sonida ushbu vahshiyona qotillik tafsilotlari ma’lum qilindi, deya xabar bermoqda UZ24 nashri.
Fuqaro Nodira Ahmadqulova 2018-yilning 6-yanvar kuni Yunusobod tuman IIBga ariza bilan murojaat qilib, jiyani — qator seriallar va kliplarda turli rollarni ijro etgan aktrisa Nilufar Sultonova 2-yanvar kuni soat taxminan 12:00 da o‘zining Spark mashinasida uyidan chiqib ketib, bedarak yo‘qolganini ma’lum qilgan. Tekshiruv-surishtiruv ishlari davomida Nilufar so‘nggi bor Po‘latjon Turg‘unboyev bilan uchrashgani aniqlangan.
Ma’lum bo‘lishicha, Po‘lat 2-yanvar kuni soat taxminan 16:00 atrofida Nilufar bilan uchrashadi. Unga do‘sti Bobur Umarovni G‘azalkentdagi uyiga olib borib kelishi kerakligini aytib, Nilufarni ham o‘zi bilan olib ketadi. Ular Po‘latning Epica mashinasida yo‘lga chiqadi. Ma’lum fursat yo‘l bosilgach, Po‘lat mashinani “Toshkent—G‘azalkent” yo‘lining ovloqroq bir joyida to‘xtatadi. Orqa o‘rindiqda o‘tirgan Bobur Nilufarning bo‘yniga sirtmoq solmoqchi bo‘lganida, qiz buni sezib qolib, mashinadan tushib qochishga urinadi.
Qizni yana zo‘rlab mashinaga o‘tkazishadi — qarshilik qilgan Nilufarning o‘ng qo‘l bilak sohasiga pichoq urishadi. “Nilufar oshiq yigiti Po‘latga iltijoli boqib, undan yordam so‘raydi. O‘zini hech narsadan xabari yo‘qday ko‘rsatgan yigit qizni shifoxonaga olib borishga va’da beradi. Qon yo‘qotish natijasida holsizlanib borayotgan Nilufarning bo‘yniga orqa o‘rindiqda o‘tirgan Bobur yana sirtmoq soladi. Ojiz qolgan qiz unga qarshilik qilolmay qoladi. Oshig‘i Po‘lat esa uning qo‘lini ushlab turadi”, — deyiladi xabarda.
So‘ngra ikki jinoiy sherik murdani mashinaning yukxonasiga solib, Nilufarning Spark mashinasi qoldirilgan joyga qaytib keladi. Murdani Epica’dan olib, Spark’ning yukxonasiga solishadi. So‘ng Spark’ni Po‘latning uyiga haydab ketishadi. O‘sha kuni soat 23:30 atrofida Nilufarning murdasi, jinoyat vaqtida ishlatilgan pichoq, arqon va boshqa ashyoviy dalillar bilan birga Toshkent viloyatidan oqib o‘tuvchi Damariq kanaliga oqizib yuboriladi. Nilufarning murdasi 12-yanvar kuni Damariqning Toshkent viloyati Toshkent tumani Ko‘ksaroy hududidan oqib o‘tgan qismidan topilgan.
Jinoyat ishlari bo‘yicha Toshkent viloyati sudi hukmi bilan Po‘latjon Turg‘unboyev Jinoyat kodeksining 97-moddasi (“qasddan odam o‘ldirish”) 2-qismi “v”, “i”, “b” bandlari bilan 19 yil muddatga, 164-modda (“bosqinchilik”) 3-qismi “g” bandi bilan 14 yil muddatga, 227-moddasi (“hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish”) 2-qismi “a” bandi bilan 2 yil muddatga hamda 59-modda (“bir necha jinoyat sodir etganlik uchun jazo tayinlash”) bilan 20 yil muddatga ozodlikdan mahrum qilindi.
Bobur Umarov esa Jinoyat kodeksining 97-moddasi (“qasddan odam o‘ldirish”) 2-qismi “v”, “i”, “b” bandlari bilan 17 yil muddatga, 164-modda (“bosqinchilik”) 3-qismi “g” bandi bilan 12 yil muddatga, 227-moddasi (“hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish”) 2-qismi “a” bandi bilan 2 yil muddatga hamda 59-modda (“bir necha jinoyat sodir etganlik uchun jazo tayinlash”) bilan 18 yil muddatga ozodlikdan mahrum etilgan.
Izoh (0)