O‘zbekistonlik tadbirkorlar Olmaotada 600 ming dollarlik shartnoma imzoladi
Qozog‘istonning Olmaota shahrida "Detstvo-2018" xalqaro bolalar kiyim-kechagi ko‘rgazmasi o‘tkazildi. Unda O‘zbekiston korxonalari ishtirok etib, Rossiya, Qozog‘iston va boshqa xorijiy mamlakatlarga mahsulot yetkazib berish bo‘yicha 600 ming dollarlik shartnomalar imzoladi. Bu haqda O‘zA xabar berdi.
O‘zmilliybank qoshidagi Kichik biznes va xususiy tadbirkorlik subyektlari eksportini qo‘llab-quvvatlash jamg‘armasi amaliy ko‘magida tashkillashtirilgan milliy ko‘rgazma stendida mamlakat to‘qimachilik bozoridagi “Lorat Tekstil”, “Bulteks Yevrostar”, “Azalium”, “Santeks”, “Kolibri Tekstil” kabi yirik ishlab chiqaruvchilar ishtirok etdi. 50 kvadrat metrdan ortiq maydonni egallagan milliy ko‘rgazma stendida O‘zbekiston korxonalarining va yengil sanoatining ulkan salohiyati va imkoniyatlari namoyish etildi.
E’tiborlisi, yengil sanoat korxonalarining mazkur tadbirdagi ishtiroki o‘zbek to‘qimachilik mahsulotlarining ichki va xalqaro hamkorlarning uzoq muddatli manfaatlariga javob beruvchi eksport salohiyatini rivojlantirishida muhim omil bo‘lib xizmat qilishi shubhasiz. Ko‘rgazma davomida xorijiy import kompaniyalari, yirik savdo tarmoqlari hamda chakana sotuvchilarni o‘zbek milliy stendi o‘ziga jalb etdi.
Shuni alohida ta’kidlash lozimki, yil yakuniga qadar O‘zmilliybank qoshidagi Kichik biznes va xususiy tadbirkorlik subyektlari eksportini qo‘llab-quvvatlash jamg‘armasi yana bir qator xalqaro tadbirlarda mahalliy tadbirkorlik subyektlari ishtirokini ta’minlashni mo‘ljallamoqda.
Hozirda Dubay, Istanbul, Pekin, Riga kabi dunyoning yirik shaharlarida o‘tkaziladigan xalqaro ko‘rgazmalarda milliy pavilyon tashkil qilish ishlari olib borilmoqda.
