Qamoqda o‘tirgan Lula da Silva Braziliya prezidentligi nomzod sifatida ko‘rsatildi

Braziliya mehnatkashlar partiyasi qamoqxonadagi sobiq prezident Luis Ignasiu Lula da Silvani mamlakat prezidentligi lavozimiga nomzod sifatida ilgari surdi. Qaror partiya umummilliy syezdida qabul qilindi, deb yozadi “Kommersant”.

“Bugun, bu tarixiy kunda, Lula respublika prezidentligi uchun bizning nomzodimiz. Biz uning nomzodini 15-avgust kuni ro‘yxatdan o‘tkazamiz”, — deya so‘z berdi partiya raisi Gleyzi Xoffman.

Bundan tashqari, syezdda Lula da Silvaning qamoqxonada yozilgan maktubi o‘qib berildi. “Nomzod bo‘laman, chunki hech qanday jinoyat sodir etmaganman”, — deb yozadi u.

Luis Lula da Silva 2001—2011-yillarda Braziliya prezidenti lavozimini egallagan.