O‘zbekiston Mudofaa vazirligi Sport klubining harbiy sportchilari MDHga a’zo davlatlar armiya o‘yinlari doirasida harbiy-amaliy sport turlari bo‘yicha musobaqalarda ishtirok etish uchun Qirg‘izistonga yetib keldi. Bu haqda vazirlik matbuot xizmati “Daryo”ga ma’lum qildi.
Harbiy sportchilar 28—31-iyul kunlari bo‘lib o‘tadigan “PM-3 va KA-3 mashqlarida shtatdagi yoki shtatga ilova qilingan jadvaldagi qurollardan otish” musobaqasida ishtirok etadi.
Guruh shaxsiy tarkibi Qirg‘izistonning Baliqchi shahridagi harbiy qismda joylashtirildi.
Mazkur musobaqa Hamdo‘stlikka a’zo mamlakatlarning qurolli kuchlari o‘rtasida do‘stlik va hamkorlikni mustahkamlash, xalqaro sportchilarni tayyorlash bo‘yicha tajriba almashish, MDH qurolli kuchlarining xalqaro maydondagi obro‘-e’tiborini oshirish maqsadida o‘tkazilmoqda.
27-iyul kuni musobaqaning tantanali ochilish marosimi bo‘lib o‘tdi. Bugun, 28-iyul kuni ishtirokchilar bellashuvlarga kirishdi.
Ushbu nufuzli musobaqa harbiy-amaliy sportning 7 turini o‘z ichiga olgan bo‘lib, “Armiya qo‘l jangi”, “Komandirlik startlari”, “Sport oriyentirlanishi”, “Tog‘ uch kurashi”, “Ko‘p kurash harbiy sport kompleksi”, “Ofitserlar uch kurashi” va “MP-3 va KA-3 mashqlarida shtatdagi yoki shtatga ilova qilingan jadvaldagi qurollardan otish” kabi bahslar bo‘yicha o‘tkazilmoqda.
Eslatib o‘tamiz, o‘zbekistonlik harbiylar 16—20-aprel kunlari Rossiyada o‘tkazilgan “Komandirlik startlari”, 26—29-iyun kunlari Belarus poytaxti Minskda harbiy-amaliy sportning “Ko‘p kurash harbiy sport kompleksi” turi bo‘yicha bo‘lib o‘tgan xalqaro musobaqalarda ikkinchi o‘rinlarni qo‘lga kiritgan edi.
Izoh (0)