Rossiyalik taniqli futbol sharhlovchisi Vasiliy Utkin o‘zining o‘zbekistonlik hakam Ravshan Ermatovni haqorat qildi.
Kecha, 21-iyun sanasida O‘zbekiston Rossiyada davom etayotgan JCh—2018 dagi ishtirokini boshladi — O‘zbekiston iftixori Ravshan Ermatov Argentina — Xorvatiya uchrashuvida bosh hakamlik qildi. O‘yin xorvatlarning 3:0 hisobidagi g‘alabasi bilan tugadi, Ermatov o‘yinda deyarli xatoga yo‘l qo‘ymadi.
Lekin hammaga birdek yaxshi ko‘rinib bo‘lmaganidek, Ravshan Ermatovdan norozilar ham paydo bo‘ldi. Ulardan biri — rossiyalik taniqli sharhlovchi Vasiliy Utkin. U o‘yin vaqti Twitter’da: “Ey, eshakdan tarqagan Ravshan Ermatov, kartochka ko‘rsatmaysanmi?”, deb yozgan.
Keyin uning bu aytganlari ko‘plab futbol muxlislarining e’tirozi va nafratiga uchradi.
Utkin bu ishi uchun uzr so‘ramadi, ammo quyidagicha tushuntirish berdi:
Ravshan Ermatov a’lo darajadagi hakam. Biroq futbol hakami haqida eng yomon gaplarni gapirmagan birorta futbol ishqibozi yo‘q. Haqoratlanmagan birorta futbol hakami ham yo‘q. Ravshan Ermatov a’lo darajadagi hakam, biroq u — hakam. Boshqa hakamlar bilan sodir bo‘ladigan ko‘ngilsiz voqealar u bilan ham sodir bo‘ladi.Ma’lumot uchun Utkin JCh—2018 davomida bitta o‘yinni Rossiyaning “Perviy kanal”ida sharhlab, so‘ng ishdan haydalgandi, nega haydalgani hozircha noma’lum. Ammo taxminlarga ko‘ra, uning efir vaqtida “Jahon Chempionati 14-iyunda boshlandi, ammo haqiqiy futbol bugundan boshlandi” (15-iyun kuni Portugaliya—Ispaniya o‘yini nazarda tutib aytilgan) degan gapi ishdan haydalishiga sabab bo‘lgan bo‘lishi mumkin.O‘zbek xalqiga, o‘zbek futboliga, o‘zbek palovi va umuman O‘zbekistonga hech qanday xusumatim yo‘q. Biroq ishqibozlik qilishga, ishqibozlik vaqtida xuddi siz kabi aqldan ozishga va omad tilashga haqliman. Agar siz buni tushunmasangiz, u holda siz ishqiboz emassiz. Yoki o‘zingizga chetdan nazar solishni bilmaysiz.
Ravshan Ermatovga, uning oilasiga, yaqinlariga, do‘stlariga va vatandoshlariga har bir yaxshi va foydali ishlarida Xudo yor bo‘lsin, ming yil umr bersin, biror marta yo‘talish nimaligini ham bilmasin!
Vasiliy Utkin, futbol sharhlovchisi
Avvalroq Sochi—2014 Olimpiadasi ochilishi vaqtida rossiyalik sharhlovchi Dmitriy Guberniyev jonli efirda O‘zbekiston olimpiya delegatsiyasini Tojikiston deb yuborib, qovun tushirgandi. Keyin tavbasiga tayanib, o‘z sayti va ijtimoiy tarmoqlardagi sahifalari orqali o‘zbekistonliklardan uzr ham so‘ragandi.
Izoh (0)