AQSh Davlat departamentining oliy mansabli vakili OAVlarda Donald Tramp Qrim yarim orolini Rossiyaniki deb hisoblashi haqida paydo bo‘lgan xabarlarni izohladi, deb yozadi “Korrespondent.net”. U Vashingtonning Qrimga nisbatan siyosati o‘zgarishsiz qolishini aytdi.
“Bizning Qrimga nisbatan munosabatimiz o‘zgarishsiz qolmoqda. Biz Ukrainaning xalqaro tan olingan chegaralari doirasidagi hududiy yaxlitligini qo‘llab-quvvatlaymiz”, — dedi Davlat departamenti vakili.
Uning so‘zlariga ko‘ra, Qrim bo‘yicha Rossiyaga kiritilgan sanksiyalar Rossiya o‘z istilosini tugatib, Qrimni Ukrainaga qaytarmagunicha, kuchda qoladi.
Avvalroq Amerikaning Buzzfeed portali diplomatik manbalariga tayanib, Tramp Qrimdagi aholining barchasi rus tilida so‘zlashishi sababli, u yer Rossiyaga tegishli deb hisoblashi haqida xabar tarqatgan edi. Bu haqda Tramp, go‘yoki, Kanadada G7 sammiti yetakchilari bilan shaxsiy suhbatda aytib o‘tgan.
Izoh (0)