Yosh amerikaliklarning 20 foizi narkotiklardan vafot etmoqda

25—35 yoshda hayotdan ko‘z yumayotgan yosh amerikaliklarning beshdan bir qismi giyohvand moddalarning dozasini oshirib yuborish yoki undan zaharlanishdan vafot etadi, deb xabar beradi “RIA Novosti”.

“Giyohvand moddalar muammosiga ko‘p e’tibor qaratilayotganiga qaramay, ular jamiyat hayotiga, xususan yoshlarga halokatli zarba berishda davom etmoqda. Agar biz ular bilan kurashishda majmuaviy yondashuv ishlab chiqmas ekanmiz, bu muammo uzoq yillar mobaynida AQSh hayotiga ta’sir o‘tkazib boraveradi”, — deydi Toronto universiteti narkologi Tara Gomes.

So‘nggi o‘n yil ichida ijtimoiy faollar va siyosatchilar AQSh hududida yangi narkomaniya epidemiyasining paydo bo‘lgani haqida gapira boshladi.

Qayd etilishicha, epidemiya oksikodon va boshqa og‘riq qoldiruvchilarning nazoratsiz tarqatilishiga yo‘l qo‘yilgani tufayli paydo bo‘lgan. Dori ishlab chiqaruvchi kompaniyalar bilan hamkorlik qilgan shifokorlar surunkali og‘riqdan aziyat chekuvchi barcha bemorlarga og‘riq qoldiruvchi dorilarni yozib bergan.

Ushbu holatni nazorat qiluvchi organlar payqab, og‘riq qoldiruvchilarni sotish cheklanganidan keyin esa ularga o‘rganib qolgan yoshlar tabletkalarning ko‘chadagi muqobili geroin va morfinga ruju qo‘ydi.

Bu esa vaziyatni chigallashtirdi hamda dozani oshirib yuborish tufayli o‘limlar sonining ortishiga olib keldi.

So‘nggi o‘n yil ichida narkotiklar tufayli 500 mingdan ortiq amerikalik hayotdan ko‘z yumgan.