25—35 ёшда ҳаётдан кўз юмаётган ёш америкаликларнинг бешдан бир қисми гиёҳванд моддаларнинг дозасини ошириб юбориш ёки ундан заҳарланишдан вафот этади, деб хабар беради «РИА Новости».
«Гиёҳванд моддалар муаммосига кўп эътибор қаратилаётганига қарамай, улар жамият ҳаётига, хусусан ёшларга ҳалокатли зарба беришда давом этмоқда. Агар биз улар билан курашишда мажмуавий ёндашув ишлаб чиқмас эканмиз, бу муаммо узоқ йиллар мобайнида АҚШ ҳаётига таъсир ўтказиб бораверади», — дейди Торонто университети наркологи Тара Гомес.
Сўнгги ўн йил ичида ижтимоий фаоллар ва сиёсатчилар АҚШ ҳудудида янги наркомания эпидемиясининг пайдо бўлгани ҳақида гапира бошлади.
Қайд этилишича, эпидемия оксикодон ва бошқа оғриқ қолдирувчиларнинг назоратсиз тарқатилишига йўл қўйилгани туфайли пайдо бўлган. Дори ишлаб чиқарувчи компаниялар билан ҳамкорлик қилган шифокорлар сурункали оғриқдан азият чекувчи барча беморларга оғриқ қолдирувчи дориларни ёзиб берган.
Ушбу ҳолатни назорат қилувчи органлар пайқаб, оғриқ қолдирувчиларни сотиш чекланганидан кейин эса уларга ўрганиб қолган ёшлар таблеткаларнинг кўчадаги муқобили героин ва морфинга ружу қўйди.
Бу эса вазиятни чигаллаштирди ҳамда дозани ошириб юбориш туфайли ўлимлар сонининг ортишига олиб келди.
Сўнгги ўн йил ичида наркотиклар туфайли 500 мингдан ортиқ америкалик ҳаётдан кўз юмган.
Изоҳ (0)