KXDR joriy haftada bo‘lib o‘tadigan Pxungeri yadroviy poligonining yopilish marosimida ishtirok etish niyatida bo‘lgan Janubiy koreyalik jurnalistlar ro‘yxatini qabul qilishdan bosh tortdi. Bu haqda KBS telekanaliga tayanib, “TASS” xabar berdi.
“Biz bugun mahalliy vaqt bilan soat 09:00 da ro‘yxatni Pxanmunjom chegara punkti orqali taqdim etishga harakat qildik, biroq Shimol uni qabul qilishdan bosh tortdi”, — deydi janublik amaldor. Bu Pxenyan o‘z poligoniga Janubiy koreyalik OAV vakillarini kiritishni istamayotganini bildiradi.
Avvalroq, Pxenyan Pxungeri yadroviy poligonini yopilish marosimida ishtirok etish uchun Janubiy Koreyadan sakkiz nafar jurnalistni taklif etgani haqida xabar berilgandi. Biroq keyinroq KXDR ularning har biridan 10 ming dollar talab qilayotgani ma’lum bo‘ldi. Marosimga tashrif buyuruvchi jurnalistlarga KXDRning Xitoydagi elchixonasida viza va tegishli hujjatlar taqdim etiladi, chunki Shimol va Janub o‘rtasida hamon diplomatik munosabatlar o‘rnatilmagan.
Yadroviy poligonni yopish borasidagi kelishuvga 27-aprel kuni Janubiy Koreya prezidenti Mun Chje In va KXDR yetakchisi Kim Chen In o‘rtasida bo‘lib o‘tgan uchrashuvda erishilgan edi.
Izoh (0)