AQSh Okean va atmosfera tadqiqotlari milliy boshqarmasi (NOAA) vahima ko‘tarmoqda — havodan olingan namunalar dunyoning qaysidir mamlakati atmosferaga taqiqlangan moddani chiqarib, Monreal protokolini buzayotgani ma’lum bo‘ldi, deb yozadi Hi-Tech Mail.Ru. Bunda gap 1930-yillarda sovitgichlarda xladagent sifatida foydalanilgan tixlorftormetan (CFC-11) haqida bormoqda.
Olimlar xlorftoruglerodlarning ozon molekulalariga vayronkor ta’sirini aniqlaganidan keyin dunyoda CFC-11 ni ishlab chiqarish 1987-yilgi Monreal protokoli bilan taqiqlangan edi.
Gavayi orollari hududida havodan olingan namunalar ayni paytda CFC-11 konsentratsiyasining barqaror kamayishi to‘xtab, 2012-yildagi ko‘rsatkichga nisbatan 50 foizga sekinlashganini ko‘rsatdi. Shu bilan birga, olimlar bunga hali yo‘q qilinmagan eski sovitgichlar sabab bo‘lgani ehtimolini istisno qilmayapti.
“Kimdir CFC-11 ni ishlab chiqarayotgani va u atmosferaga sizib chiqayotgani ehtimoli yuqoriroq, — dedi olim Stiven Montska. — Ular buni nima uchun va qanday maqsadda qilayotganini bilmaymiz — bu qandaydir kimyoviy jarayonning qo‘shimcha mahsuloti bo‘lishi mumkin”.
Olimlar so‘zlariga ko‘ra, hozircha ifloslanish manbasi joylashgan joyni aniqlash qiyin, ammo havo oqimlari tahlili Sharqiy Osiyo hududini ko‘rsatmoqda.
Izoh (0)