Samarqandda xato tufayli bitta yer ham maktabga, ham bog‘chaga ajratildi. Natijada tabdirkorlar orasida bahs kelib chiqdi

O‘zAga Samarqand shahridagi “Oazis Samarkand” mas’uliyati cheklangan jamiyati direktori B. Nabiyev imzosi bilan shikoyat xati kelib tushdi. Unda jumladan, shunday yoziladi:

Samarqand shahar hokimining 2017-yil 30-yanvardagi 114-Q-raqamli qarori bilan “Oazis Samarkand” mas’uliyati cheklangan jamiyatiga tovon tariqasida Samarqand shahar Amir Temur ko‘chasidagi “Yosh oilalar shaharchasi” hududidan 1350 kvadrat metr yer maydoni ajratilib, zamonaviy maktab binosi qurilishiga ruxsat berilgan.

…Zamonaviy maktab loyihasi ishlab chiqilishi natijasida ajratilgan yer maydoni yetarli emasligi aniqlandi. Sababi 1350 kvadrat metr maydonga qurilish bo‘ladi, qolgan 3600 kvadrat metr yer maydonida esa bolalar uchun o‘yingoh, tanaffus paytidagi dam olish joylari, daraxtzorlar va yashil zona tashkil qilish rejalashtirilmoqda. Shuning uchun atrofda bo‘sh turgan 3600 kvadrat metr yer maydoni qurilishi rejalashtirilgan maktab binosi atrofini obodonlashtirish va ko‘kalamzorlashtirish uchun qo‘shimcha joy sifatida biriktirib berishni so‘raganmiz.

Xatda bayon etilishicha, 2017-yil davomida jamiyat ushbu qo‘shimcha yer maydoni ajratishni so‘rab Samarqand shahar, viloyat hokimliklariga, so‘ngra viloyat va respublika idoralariga murojaat qildi. Hatto sud organlarigacha boradi. Lekin masala hanuzgacha hal etilmagan. Shikoyat xatlariga esa turli xil javoblar kelgan. Bu javoblar orasida so‘ralayotgan yer uchun tender o‘tkazilishi ma’lum qilingan, hududdagi ko‘p qavatli uylarda yashovchi aholi roziligi olinishi ko‘rsatilgan yoki yer maydoni elektr uzatish tarmog‘i muhofaza zonasida ekanligi bayon etilgan xatlar ham bor.

MJCh yuristi F. Shukrullayevning ma’lum qilishicha, ushbu hududda maktab qurish bo‘yicha zarur hujjatlar, loyihalar tayyorlangan. Ular o‘zlari uchun tovon sifatida ajratilgan maydonda bo‘lsa ham qurilish boshlashga tayyor. Ammo endilikda bunga shu hududda qurilgan ko‘p qavatli 60 va 60 “a” uylarda yashovchi aholi norozilik bildirmoqda. Shahar hokimligi mutasaddilari esa aholi roziligi bilan qurilish boshlaysizlar, deb talab qo‘ygan. Mazkur uylarda yashovchi aholi bu hududda bolalar sport maydonchalari, muzqaymoq pavilyoni qurilishini istaydi.

Xullas, shuncha idoralar aralashuviga qaramay masala chigallaligicha qolmoqda. Agentlik Samarqand shahar hokimi F. Rahimovga ushbu shikoyat yuzasidan murojaat qilganida yana bir yangi “gap” aytildi.

Shahar hokimining ma’lum qilishicha, yaqinda masala joyida borib o‘rganilib, qurilishni boshlashga kirishilgach, ushbu yer maydonining yana bir “egasi” chiqqan. 2012-yil mazkur hududdagi sobiq avtomobil ehtiyot qismlari bozori buzilganda shu yerda faoliyat ko‘rsatgan tadbirkorlardan biriga ushbu yer maydoni maktabgacha ta’lim muassasasi qurish uchun ajratib berilgan ekan. Ayni paytda bitta yer uchun ikki xil qarorga ega tadbirkorlar bilan uchrashib, masalani hal etish choralari ko‘rilmoqda.

Agentlik vaziyatni kuzatishda davom etmoqda.