ЎзАга Самарқанд шаҳридаги «Оазис Самарканд» масъулияти чекланган жамияти директори Б. Набиев имзоси билан шикоят хати келиб тушди. Унда жумладан, шундай ёзилади:
Самарқанд шаҳар ҳокимининг 2017 йил 30 январдаги 114-Қ-рақамли қарори билан «Оазис Самарканд» масъулияти чекланган жамиятига товон тариқасида Самарқанд шаҳар Амир Темур кўчасидаги «Ёш оилалар шаҳарчаси» ҳудудидан 1350 квадрат метр ер майдони ажратилиб, замонавий мактаб биноси қурилишига рухсат берилган.Хатда баён этилишича, 2017 йил давомида жамият ушбу қўшимча ер майдони ажратишни сўраб Самарқанд шаҳар, вилоят ҳокимликларига, сўнгра вилоят ва республика идораларига мурожаат қилди. Ҳатто суд органларигача боради. Лекин масала ҳанузгача ҳал этилмаган. Шикоят хатларига эса турли хил жавоблар келган. Бу жавоблар орасида сўралаётган ер учун тендер ўтказилиши маълум қилинган, ҳудуддаги кўп қаватли уйларда яшовчи аҳоли розилиги олиниши кўрсатилган ёки ер майдони электр узатиш тармоғи муҳофаза зонасида эканлиги баён этилган хатлар ҳам бор.…Замонавий мактаб лойиҳаси ишлаб чиқилиши натижасида ажратилган ер майдони етарли эмаслиги аниқланди. Сабаби 1350 квадрат метр майдонга қурилиш бўлади, қолган 3600 квадрат метр ер майдонида эса болалар учун ўйингоҳ, танаффус пайтидаги дам олиш жойлари, дарахтзорлар ва яшил зона ташкил қилиш режалаштирилмоқда. Шунинг учун атрофда бўш турган 3600 квадрат метр ер майдони қурилиши режалаштирилган мактаб биноси атрофини ободонлаштириш ва кўкаламзорлаштириш учун қўшимча жой сифатида бириктириб беришни сўраганмиз.
МЖЧ юристи Ф. Шукруллаевнинг маълум қилишича, ушбу ҳудудда мактаб қуриш бўйича зарур ҳужжатлар, лойиҳалар тайёрланган. Улар ўзлари учун товон сифатида ажратилган майдонда бўлса ҳам қурилиш бошлашга тайёр. Аммо эндиликда бунга шу ҳудудда қурилган кўп қаватли 60 ва 60 «а» уйларда яшовчи аҳоли норозилик билдирмоқда. Шаҳар ҳокимлиги мутасаддилари эса аҳоли розилиги билан қурилиш бошлайсизлар, деб талаб қўйган. Мазкур уйларда яшовчи аҳоли бу ҳудудда болалар спорт майдончалари, музқаймоқ павильони қурилишини истайди.
Хуллас, шунча идоралар аралашувига қарамай масала чигаллалигича қолмоқда. Агентлик Самарқанд шаҳар ҳокими Ф. Раҳимовга ушбу шикоят юзасидан мурожаат қилганида яна бир янги «гап» айтилди.
Шаҳар ҳокимининг маълум қилишича, яқинда масала жойида бориб ўрганилиб, қурилишни бошлашга киришилгач, ушбу ер майдонининг яна бир «эгаси» чиққан. 2012 йил мазкур ҳудуддаги собиқ автомобиль эҳтиёт қисмлари бозори бузилганда шу ерда фаолият кўрсатган тадбиркорлардан бирига ушбу ер майдони мактабгача таълим муассасаси қуриш учун ажратиб берилган экан. Айни пайтда битта ер учун икки хил қарорга эга тадбиркорлар билан учрашиб, масалани ҳал этиш чоралари кўрилмоқда.
Агентлик вазиятни кузатишда давом этмоқда.
Изоҳ (0)