Pasport o‘rniga ID-karta, poraxo‘r o‘qituvchi va shifokorlar, amaldagi avtoraqam o‘rniga “xalqaro namunadagi” avtoraqam va kunning boshqa muhim xabarlari

20-aprelning e’tiborga molik yangiliklari — “Daryo”ning kechki dayjestida.

1. Toshkentda pasportlar o‘rniga ID-kartalar tizimi 1-noyabrgacha sinov rejimida joriy qilinadi. 1-iyulgacha loyihani moliyalashtirish bo‘yicha takliflar kiritiladi, 1-avgustgacha esa uning texnik-iqtisodiy asosi tayyorlanadi.

2. O‘zbekistonda avtomobil raqamlari xalqaro raqamlarga almashtiriladi, barcha qog‘oz hujjatlar esa bekor qilinadi. 1-noyabrgacha loyiha Toshkentda budjetdan tashqari mablag‘lar hisobidan sinov rejimida ishga tushiriladi.

3. “Poraxo‘rlar paradi”: Qashqadaryoda xalq ta’limi bo‘limi mudiri pora bilan qo‘lga tushdi, Samarqandda esa tug‘uruqxonalardagi shifokorlar pora olayotgan vaqti ushlandi.

4. GM Uzbekistan avtomobil yetkazib berishni tezlashtirishni va’da qilayotganlarga ishonmaslikka chaqirdi. “Avtomobil yetkazib berish to‘g‘risidagi shartnomalar faqat ro‘yxatga olingan rasmiy murojatlar (arizalar) asosida avtomatik tarzda yaratiladigan yagona elektron navbat bo‘yicha amalga oshiriladi”.

5. Qashqadaryodagi portlash va yong‘in sababi aniqlandi: nobakor o‘g‘il onasi va singlisini o‘ldirib, jasadlarni yoqib yuborgan.