Oliy Majlis Qonunchilik palatasining navbatdagi majlisi bo‘lib o‘tdi. Bu haqda palata axborot xizmati xabar bermoqda.
Deputatlar “Ommaviy axborot vositalari to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi qonun loyihasini ikkinchi o‘qishda ko‘rib chiqdi.
Qonun loyihasini ikkinchi o‘qishga tayyorlash jarayonida ishchi guruh tashkil etilib, uning tarkibiga siyosiy partiyalar fraksiyalari va O‘zbekiston Ekologik harakati deputatlar guruhi deputatlari, vazirliklar va idoralarning, fuqarolik jamiyati institutlarining vakillari, amaliyotchi mutaxassislar, olimlar kiritildi.
Bundan tashqari, keng muhokama qilish maqsadida ushbu qonun loyihasi Qonunchilik palatasining www.parliament.gov.uz. veb-saytiga joylashtirildi. Muhokama yakunlariga ko‘ra kelib tushgan takliflarning katta qismi qonun loyihasini maromiga yetkazishda hisobga olindi. Xorijiy tajribadan kelib chiqqan holda OAVda turkum nashrning xalqaro standarti raqami (ISSN) bo‘lishi kerakligi haqidagi talabni chiqarib tashlash taklif etildi.
Davlat organlari faoliyatining ochiqligini ta’minlash sohasida jurnalistlarning nufuzini oshirishga qaratilgan “Jurnalistlik faoliyatini himoya qilish to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi qonun loyihasi ham ikkinchi o‘qishda ko‘rib chiqildi.
Mazkur qonun loyihasi Germaniya, Buyuk Britaniya, Avstriya, AQSh, Rossiya, Latviya, Ukraina, Belarus, Qozog‘iston, Ozarbayjon kabi mamlakatlar tajribasi va jurnalistlik faoliyatini himoya qilish sohasidagi xalqaro shartnomalarni hisobga olgan holda ishlab chiqilgan.
Shundan so‘ng deputatlar jismoniy va yuridik shaxslarning murojaatlarini tahlil qilish natijalariga ko‘ra Adliya vazirligi tomonidan ishlab chiqilgan “O‘zbekiston Respublikasining Mehnat kodeksiga o‘zgartish va qo‘shimcha kiritish haqida”gi qonun loyihasini ikkinchi o‘qishda ko‘rib chiqishga kirishdi.
Qonun loyihasida fuqarolarning mehnat qilish va erkin ish tanlash huquqlarining amalga oshirilishini ta’minlash maqsadida shaxsni uning ilgari sudlanganligi tufayli ishga qabul qilishni rad etishga (qonun hujjatlarida nazarda tutilgan hollar bundan mustasno) taqiq belgilash uchun o‘zgartish va qo‘shimcha kiritish nazarda tutilmoqda.
Deputatlar “O‘zbekiston Respublikasi Soliq kodeksining 356-moddasiga qo‘shimcha kiritish to‘g‘risida”gi qonun loyihasini birinchi o‘qishda ko‘rib chiqdi. Mazkur hujjat elektron tijorat infratuzilmasini joriy etishni hamda turistik xizmatlarni onlayn-bronlashtirish va Internet orqali turistik mahsulotlarni sotish bo‘yicha xizmatlar ko‘rsatuvchi turistik faoliyat sub’ektlari sonining ko‘payishini rag‘batlantirish maqsadida ishlab chiqilgan. Qonun loyihasini tayyorlashda Rossiya, Belarus va Gruziya tajribasi o‘rganildi. Bu mamlakatlarda turizm sohasi uchun soliq imtiyozlari mavjud.
Deputatlarning ta’kidlashicha, ushbu qonunning qabul qilinishi sohada, shu jumladan, axborot-kommunikatsiya texnologiyalarini faol joriy etish orqali ko‘rsatilayotgan xizmatlar sifati va tezkorligini oshirishga, shuningdek, turistik xizmatlar narxini pasaytirishga, ularni diversifikatsiya va modernizatsiya qilishga, raqobatni kuchaytirishga xizmat qiladi.
Majlis yakunlariga ko‘ra barcha ko‘rib chiqilgan qonun loyihalari qabul qilindi.
Izoh (0)