Toshkent viloyatining barcha shahar-tumanlarida nogironligi bo‘lgan shaxslarga fuqarolik pasportlari topshirilmoqda, deb xabar beradi Toshkent viloyati IIB matbuot xizmati.
Jumladan, Zangiota tumanida Sortepa mahallasida yashovchi, nogironligi bo‘lgan fuqaro Jangish Ashurova xonadoniga tuman prokuraturasi va ichki ishlar bo‘limi rahbarlari tashrif buyurib, fuqarolik pasportini topshirdi.
“Shu mahallada istiqomat qiluvchi Abdurahmon Ortiqboyev ham nogironligi bo‘lgan shaxslar ro‘yxatida turadi. Toshkent viloyati Ichki ishlar boshqarmasi Migratsiya va fuqarolikni rasmiylashtirish boshqarmasi tomonidan fuqarolik pasporti uchun zarur bo‘lgan suratga olish va barmoq izlarini olishga mo‘ljallangan mobil qurilma vositasi orqali boshqalar qatori uning uyiga ichki ishlar bo‘limi xodimlari kelib, suratga olishib, barmoq izlari olingan edi. Bugun tayyor bo‘lgan fuqarolik pasportini qo‘liga topshirdi”, — deyiladi xabarda.
Shuningdek, nogironligi bo‘lgan fuqarolar Muborak Yunusova, Mavjuda Xasanova va Jamoliddin Xasanovlarga ham fuqarolik pasportlari o‘z uylarida topshirilib, mutasaddilar tomonidan maxsus sovg‘a-salomlar taqdim etildi.
Izoh (0)