Qonunchilik palatasida inson huquqlarini himoya qilish borasidagi milliy ma’ruza muhokama qilindi

O‘zbekiston BMTning “Qiynoq hamda muomala va jazolashning qattiq shafqatsiz, insoniylikka zid yoki qadr-qimmatni kamsituvchi turlariga qarshi konvensiya”sini 1995-yili ratifikatsiya qilib, uning ijrosi bo‘yicha xalqaro tashkilotga belgilangan muddatda milliy ma’ruzalar yuboradi. Bu haqda O‘zA xabar bermoqda.

Oliy Majlis Qonunchilik palatasida “Qiynoq hamda muomala va jazolashning qattiq shafqatsiz, insoniylikka zid yoki qadr-qimmatni kamsituvchi turlariga qarshi konvensiya nizomining ijro etilishi yuzasidan O‘zbekiston Respublikasining beshinchi milliy ma’ruzasi” bo‘yicha qo‘mita eshituvi bo‘lib o‘tdi.

Quyi palataning Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi tomonidan tashkil etilgan tadbirda qo‘mitaning ekspertlar guruhi a’zolari, Inson huquqlari bo‘yicha O‘zbekiston milliy markazi mas’ul xodimlari, Oliy Sud, Bosh prokuratura, Ichki ishlar, Adliya vazirligi vakillari, deputatlar qatnashdi.

Tadbirda mamlakat inson huquqlariga oid xalqaro huquq normalarini milliy qonunchilikka implementatsiya qilish, inson huquqlari sohasida zimmasidagi xalqaro shartnomaviy majburiyatlarni so‘zsiz bajarish bo‘yicha dunyoning yetakchi davlatlari qatoridan joy olganligi alohida qayd etildi. O‘zbekiston xalqaro huquqning teng huquqli subyekti sifatida bevosita inson huquqlariga oid 70 dan ortiq universal va mintaqaviy xalqaro shartnoma, jumladan, BMTning 10 ta asosiy shartnomasi ishtirokchisi hisoblanadi.

Prezident Konstitutsiya qabul qilinganligining 25 yilligi munosabati bilan 2700 nafar sudlanganlarni afv etishi ham ana shu insonparvar siyosatning yuksak namunasi. Davlat rahbarining Oliy Majlisga Murojaatnomasidagi O‘zbekistonda hibsga olingan va jinoiy javobgarlikka tortilgan shaxslarga nisbatan qiynoqqa solish, ruhiy hamda jismoniy bosim o‘tkazish, boshqa g‘ayriinsoniy zo‘ravonlikka mutlaqo yo‘l qo‘yilmasligi to‘g‘risidagi fikrlari bevosita parlament, xususan, deputatlar zimmasiga ham ulkan mas’uliyat yuklaydi.

Tadbirda ishtirokchilar tomonidan beshinchi milliy ma’ruzaga munosabat, uni takomillashtirishga doir mulohazalar, shuningdek, sohadagi muammolar va ularning yechimiga oid amaliy takliflar bildirildi.