Ўзбекистон БМТнинг «Қийноқ ҳамда муомала ва жазолашнинг қаттиқ шафқатсиз, инсонийликка зид ёки қадр-қимматни камситувчи турларига қарши конвенция»сини 1995 йили ратификация қилиб, унинг ижроси бўйича халқаро ташкилотга белгиланган муддатда миллий маърузалар юборади. Бу ҳақда ЎзА хабар бермоқда.
Олий Мажлис Қонунчилик палатасида «Қийноқ ҳамда муомала ва жазолашнинг қаттиқ шафқатсиз, инсонийликка зид ёки қадр-қимматни камситувчи турларига қарши конвенция низомининг ижро этилиши юзасидан Ўзбекистон Республикасининг бешинчи миллий маърузаси» бўйича қўмита эшитуви бўлиб ўтди.
Қуйи палатанинг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси томонидан ташкил этилган тадбирда қўмитанинг экспертлар гуруҳи аъзолари, Инсон ҳуқуқлари бўйича Ўзбекистон миллий маркази масъул ходимлари, Олий Суд, Бош прокуратура, Ички ишлар, Адлия вазирлиги вакиллари, депутатлар қатнашди.
Тадбирда мамлакат инсон ҳуқуқларига оид халқаро ҳуқуқ нормаларини миллий қонунчиликка имплементация қилиш, инсон ҳуқуқлари соҳасида зиммасидаги халқаро шартномавий мажбуриятларни сўзсиз бажариш бўйича дунёнинг етакчи давлатлари қаторидан жой олганлиги алоҳида қайд этилди. Ўзбекистон халқаро ҳуқуқнинг тенг ҳуқуқли субъекти сифатида бевосита инсон ҳуқуқларига оид 70 дан ортиқ универсал ва минтақавий халқаро шартнома, жумладан, БМТнинг 10 та асосий шартномаси иштирокчиси ҳисобланади.
Президент Конституция қабул қилинганлигининг 25 йиллиги муносабати билан 2700 нафар судланганларни афв этиши ҳам ана шу инсонпарвар сиёсатнинг юксак намунаси. Давлат раҳбарининг Олий Мажлисга Мурожаатномасидаги Ўзбекистонда ҳибсга олинган ва жиноий жавобгарликка тортилган шахсларга нисбатан қийноққа солиш, руҳий ҳамда жисмоний босим ўтказиш, бошқа ғайриинсоний зўравонликка мутлақо йўл қўйилмаслиги тўғрисидаги фикрлари бевосита парламент, хусусан, депутатлар зиммасига ҳам улкан масъулият юклайди.
Тадбирда иштирокчилар томонидан бешинчи миллий маърузага муносабат, уни такомиллаштиришга доир мулоҳазалар, шунингдек, соҳадаги муаммолар ва уларнинг ечимига оид амалий таклифлар билдирилди.
Изоҳ (0)