Ziyorat turizmiga musulmon davlatlardan sayyohlarni jalb qilish maqsadida “Toshkent – Samarqand – Buxoro” yo‘nalishi bo‘yicha “Kichik haj” konsepsiyasi ishlab chiqiladi, deya xabar bermoqda “Xalq so‘zi” gazetasi.
Joriy yildan boshlab mamlakatdagi moddiy madaniy meros obyektlarida va ular atrofidagi obyektlarda tegishli infratuzilmani shakllantirish, amalga oshiriladigan diniy marosimlar uchun tegishli sharoitlarni yaratish orqali ziyorat turizmini sohaning istiqbolli yo‘nalishi sifatida, shu jumladan, musulmon davlatlari uchun “Kichik haj” ziyorat tizimini rivojlantirishga katta e’tibor qaratiladi.
Bu haqda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” davlat dasturi loyihasida to‘xtalib o‘tilgan.
Shu bo‘yicha joriy yil 10-fevral kuniga qadar ishlab chiqiladigan normativ-huquqiy hujjat loyihasida ziyorat turizmi bo‘yicha xizmat ko‘rsatish obyektlari tomonidan qo‘llanilishi majburiy bo‘lgan standartlarni qabul qilish, sayyohlarni keng jalb qilish uchun zaruriy infratuzilmani shakllantirish, ziyoratchilar uchun xizmat ko‘rsatishning maqbul turlarini joriy etish rejalashtiriladi. Yana bir muhim jihati, ziyorat turizmiga musulmon davlatlardan sayyohlarni jalb qilish borasida “Toshkent – Samarqand – Buxoro” yo‘nalishi bo‘yicha “Kichik haj” konsepsiyasini ishlab chiqish nazarda tutiladi.
Izoh (0)