Toshkent shahar IIBB xodimlari tomonidan o‘tkazilgan tadbir davomida 1964-yilda tug‘ilgan Gennadiy Galimov va 1971-yilda tug‘ilgan Toshkenboy Tagaymuratov daydilikda gumonlanib, Toshkent shahar Reabilitatsiya markaziga olib kelindi. Bu haqda IIBB matbuot xizmati xabar berdi.
G. Galimov tekshirilgan vaqtda u muqaddam JKning 223-moddasi 2-qismi (qonunga xilof ravishda chet elga chiqish va O‘zbekiston Respublikasiga kirish) bilan sudlanganligi va jinoyat ishlari bo‘yicha Sirdaryo viloyati Guliston shahar sudining ajrimiga asosan unga nisbatan axloq tuzatish ishlari jazosi tayinlanganligi ma’lum bo‘ldi. Biroq G. Galimov jazoni o‘tashdan qasddan bo‘yin tovlab, ro‘yxatda bo‘lgan Toshkent viloyatidagi manzilida yashamasdan, Toshkent shahri hududida yurganligi aniqlandi.
T. Tagaymuratov tekshirilgan vaqtda u ham oldin JKning 223-moddasi 2-qismi bilan sudlanganligi va jinoyat ishlari bo‘yicha Navoiy viloyati, Navoiy shahar sudining ajrimiga asosan unga nisbatan axloq tuzatish ishlari jazosi tayinlanganligi aniqlandi. Ammo u jazoni o‘tashdan bo‘yin tovlab, Toshkent viloyatidagi manzilida emas, Toshkent shahri hududida yurgani ma’lum bo‘ldi.
Hozirda ularning boshqa jinoyatlarga aloqadorligi tekshirilmoqda.
Izoh (0)