Тошкент шаҳар ИИББ ходимлари томонидан ўтказилган тадбир давомида 1964 йилда туғилган Геннадий Галимов ва 1971 йилда туғилган Тошкенбой Тагаймуратов дайдиликда гумонланиб, Тошкент шаҳар Реабилитация марказига олиб келинди. Бу ҳақда ИИББ матбуот хизмати хабар берди.
Г. Галимов текширилган вақтда у муқаддам ЖКнинг 223-моддаси 2-қисми (қонунга хилоф равишда чет элга чиқиш ва Ўзбекистон Республикасига кириш) билан судланганлиги ва жиноят ишлари бўйича Сирдарё вилояти Гулистон шаҳар судининг ажримига асосан унга нисбатан ахлоқ тузатиш ишлари жазоси тайинланганлиги маълум бўлди. Бироқ Г. Галимов жазони ўташдан қасддан бўйин товлаб, рўйхатда бўлган Тошкент вилоятидаги манзилида яшамасдан, Тошкент шаҳри ҳудудида юрганлиги аниқланди.
Т. Тагаймуратов текширилган вақтда у ҳам олдин ЖКнинг 223-моддаси 2-қисми билан судланганлиги ва жиноят ишлари бўйича Навоий вилояти, Навоий шаҳар судининг ажримига асосан унга нисбатан ахлоқ тузатиш ишлари жазоси тайинланганлиги аниқланди. Аммо у жазони ўташдан бўйин товлаб, Тошкент вилоятидаги манзилида эмас, Тошкент шаҳри ҳудудида юргани маълум бўлди.
Ҳозирда уларнинг бошқа жиноятларга алоқадорлиги текширилмоқда.
Изоҳ (0)