Фарғона вилоятида Ҳаж зиёратига боришга номзод фуқаролар Вазирлар Маҳкамасининг 2017 йил 28 декабрдаги қарорига асосан тасдиқланган Ҳаж ва Умра тадбирларини ташкил этиш ва ўтказиш тартиби тўғрисидаги Низомда назарда тутилган талаблар асосида суҳбатдан ўтказилади ва сараланади. Бу ҳақда Фарғона вилояти ҳокимлиги «Дарё»га маълум қилди.
Низомга мувофиқ, маҳалла фуқаролар йиғини раиси томонидан номзодларнинг алоҳида рўйхати шакллантирилди. Номзодларга улар суҳбатдан ўтказиш ва саралаш учун рўйхатга қўшилганлиги ҳамда суҳбатдан ўтказиш санаси ва жойи тўғрисида хабар берилди. Жойлардаги туман (шаҳар) ҳокими томонидан тузилган, 7 кишидан иборат ишчи гуруҳ ҳар ойнинг 5-санасидан кеч бўлмаган муддатда шаклланган рўйхат асосида Ҳажга борадиган зиёратчи сифатида навбатга қўйиш учун номзодларни суҳбатдан ўтказди ва саралади.
Саралашдан сўнг Ҳажга боришга навбатга қўйиладиган номзодлар рўйхати тегишли ҳудуддаги масжид ва фуқароларнинг ўзини ўзи бошқариш органлари биноларида эълон қилинди ва 15 кун мобайнида улар бўйича жамоатчилик фикри ўрганилади. Жамоатчилик томонидан билдирилган таклиф ё эътирозлар ишчи гуруҳ томонидан 5 кун муддатда кўриб чиқилди ва текширилди. Шундан сўнг, ишчи гуруҳ жамоатчилик фикри асосида фуқарони Ҳажга борувчи сифатида навбатга қўйиш учун фуқароларнинг ўзини ўзи бошқариш органига 1 кун муддатда тавсия берди.
Хабар беришларича, Ҳажга боришга навбатга қўйиладиган номзод моддий ва жисмоний жиҳатдан унга қодир бўлиши, амалларни тўғри ва тўла-тўкис адо этиш учун етарли диний билимга эга бўлиши, маънавияти, маърифати ва одоб-ахлоқи билан маҳаллада обрў-эътиборли бўлиши каби талабларга жавоб бериши керак. Шунингдек, киритилган ўзгартиришларга кўра, Ҳажга бормоқчи бўлган фуқаро аввал Ҳажга бормаган бўлиши лозим (олдинги талабда сўнгги 5 йил инобатга олинар эди).
Жорий йилда Фарғона вилоятида Низомдаги янги талабларга мувофиқ 950 нафар фуқаро Ҳаж зиёратига отланиш учун рўйхатга олинди.
Мен қирқ йилдан зиёд таълим соҳасида меҳнат қилдим. Тўрт нафар фарзандни тарбиялаб вояга етказдим. Набираларим эл корига яраб қолди. Бахтли фаровон ҳаёт кечиряпман. Ягона орзум — мусулмончиликнинг муҳим амалларидан бири — Ҳаж сафарини адо этиш эди.Аллоҳга шукрким, Ҳажга ҳар томонлама муносиб инсонлар бориши лозимлиги тўғрисидаги талаблардан кейин, менинг қалбимда ҳам бир учқун пайдо бўлди. Маҳалламизда бўлган йиғинда номзодим ҳам тавсия қилинди. Юртимиз ижтимоий ҳаётида фаол иштироким, маҳалладаги тадбирларда доимий қатнашиб келганлигим эътиборга олиниб, Ҳаж зиёратига боришим айтилганида, кўзларимга ёш келди.
Инсоннинг эзгу амаллари эътироф этиладиган, бундай адолатли тизим жорий қилинганлиги учун Аллоҳга шукрлар айтдим. Менга мусулмонларнинг ушбу эзгу амалини бажариш жараёнида маҳалламизда истиқомат қилаётган диний экстремистик оқимига нотўғри кириб қолган ожиза аёлнинг бириктириб берилгани зиммамдаги масъулиятни икки карра оширди. Энди мен бу фуқаронинг ижтимоий ҳаётга қайтиши, Ватанга дахлдорлик ҳиссини оширишга бўлган ишончини уйғотишга, уни чинакам ватанпарвар бўлиб тарбияланишига ўз ҳиссамни қўшаман.
Нажибахон Абдуллаева, марғилонлик 74 ёшли онахон
Мавзуга доир: 2018 йилги Ҳаж зиёрати нархи ҳали белгиланмаган
Изоҳ (0)