“O‘zsanoatqurilishbank” O‘zbekiston Vazirlar Mahkamasi muassisligida chop etiladigan “Pravda Vostoka” gazetasida 25-oktabr kuni e’lon qilingan tanqidiy maqolaga munosabat bildirdi. Bank munosabati 1-noyabr kuni moliya muassasasining rasmiy saytida e’lon qilingan.
Maqolada “Navoiy Tinch Tekstil” kompaniyasiga bankning Navoiy viloyat filiali tomonidan Xitoy davlat taraqqiyot banki (XDTB)ning kredit liniyasidan kredit ajratilmaganligi oqibatida loyiha barbod bo‘lgani, bank tomonidan XDTB kredit liniyasi o‘rniga milliy valyutada kredit ajratish taklif etilgani loyihani amalga oshirishda katta to‘siq bo‘lgani, mijoz bankdan bunday munosabat kutmagani yozilgan.
“O‘rganish davomida maqolada keltirilgan biror bir holat va vajlar o‘z tasdig‘ini topmaganligi aniqlandi”, — deyiladi bank Ijro apparati munosabatida. Ayni vaqtda, bank saytida e’lon qilingan raddiyaga “Navoiy Tinch Tekstil” kompaniyasi rahbari Jo‘rabek Xoliqov tomonidan “Pravda Vostoka”ga yozilgan e’tiroz xati ilova qilingan.
Jo‘rabek Xoliqov o‘z xatida uning kompaniyasi va “O‘zsanoatqurilishbank” o‘rtasida “juda yaxshi hamkorlik” yo‘lga qo‘yilgani, ikki tashkilot o‘rtasida “tushunmovchilik yoki hal etib bo‘lmaydigan muammo yo‘q”ligini bildirgan. Shuningdek, u “Pravda Vostoka” gazetasining Navoiy viloyatidagi muxbirini tanimasligi, bank bilan korxona o‘rtasida maqola yozish haqida hech kimga murojaat qilmaganini bayon etgan.
“Ushbu maqolada keltirilgan holat haqiqiy vaziyatga mutlaqo to‘g‘ri kelmaydi”, — deb qo‘shimcha qiladi Jo‘rabek Xoliqov. Ayni vaqtda, uning qo‘shimcha qilishicha, uning korxonasi 2017-yil 26 oktabr kuni (“Pravda Vostoka”da tanqidiy maqola e’lon qilinganidan bir kun o‘tib) bankning Navoiy filialiga ariza bilan murojaat qilib, kredit olish uchun hujjatlar to‘plamini taqdim etgan.
“Murojaatimiz bank filiali tomonidan 1 kun ichida ko‘rib chiqilib, Kredit komissiyasi tomonidan kredit ajratish bo‘yicha ijobiy xulosa berilgan va 27-oktabr kuni tasdiqlash uchun Bosh bankning Kredit qo‘mitasiga yuborilgan”, — deb yozadi Jo‘rabek Xoliqov. Xoliqovning korxonasi XDTBning kredit liniyasidan 205 330 dollar miqdorida kredit olish istagini bildirgan.
“Pravda Vostoka”ning tegishli maqolasidan parcha 1-noyabr kuni “Daryo” internet-nashrida ham e’lon qilingan edi. Bankning “Pravda Vostoka” maqolasiga munosabati “Daryo”dagi xabar e’lon qilingach paydo bo‘ldi. Bank va “Navoiy Tinch Tekstil” korxonasi “Pravda Vostoka” maqolasiga nima uchun faqat bir hafta o‘tgach munosabat bildirgani hozircha noma’lum.
Izoh (0)